حسن العربى يكتب: العزبة صبحت ملكنا .. شئ مننا

الجرى نص الجدعنة والشجعنة
والجبن يخلق فرعنة
. . . . . . . . .
للشعننة كان عندى وصفة ممكنة
لما يفيض بينا العنا والأرعنة
ونشوف ذنوب متشرعنة . . بالعنعنة
والحوت يسوق الفجعنة والملعنة
كان عندى وصفة ممكنة:
. . . . . . . . . . .
إنك تسوق المسكنة تلاتين سنة
والمستبد يمل قص الألسنة . . ويجِّـسنا
من تانى يعلا حسِّنا . . من نِفسنا
ونفك بيه عن نفسنا
. . . . . . . . . . .
و يقول كلامهم فى الهوا . . بَلا فهلوة
اللأه عندى يعنى آه . . و إن قالوا آه جتهم أوا
و الهوهوة مش فَـنِنا . . ولا سننا
. . . . . . . . . . .
وإللى يحَضَّر جننا
لا يوم حايقدر يصرفه . . أو يُظرُفه
أو م البنوك حايسلفه . . و يسدِّنا
أو بالمعالى يعرِّفه . . و يوظفه
و ينغنغه من كَـدِّنا
ويشرفه . . يلعن أبونا وجدنا
. . . . . . . . . . .
إللى يحَضَّر جننا
لا يوم حايقدر يصرفه
أو يقرفه . . و يعنِّفه
يأمر ولادنا يهتفوا . . و يخوِّفه
أمه و عياله يختفوا . . و يكتفه . . و يهدنا
و يصير مداسه خدِّنا
و يلمنا . . يُعبُطنا ولَّلا يمدنا
. . . . . . . . . . .
يا ريتها جت على مدنا أو جزرنا
لو ننخلع من جِذرنا . . فيه بذرنا
وسط الميدان
وسط الميدان حانبعزقه من حجرنا
فى ليلة وردية
ليلة مطر برقية رعدية
يشبط فى كومة طين مندية
من غير مدادية . . يعرق بجدية . . يرضع عنادية
يحلم براسه لفوق . . فوق الحيتان بشوات وأفندية
راسه براسهم . . وف دمه ندِّية
. . . . . . . . . . .
وف بورصة المخاليق تصبح لِنا ديِّـه
أما الكرامة ماهيش كوبرى و معديِّـة
مافيش غلطة معدية ولا غلطة معديِّـة
وإنجى زى سعدية
وسوزى زى نبوية
. . . . . . . . . . .
الوصفة كانت ممكنة
أقراص خيابة مُسكنة
للجرى بين الأمكنة
دلوقتى إحنا الأمكنة والأزمنة
مين إللى تانى يُسُكِّنا؟
العزبة صبحت ملكنا . . شئ مننا
من غير أيامه و شعننة
ولا جبن يخلق فرعنة
و لا جرى نصه جدعنة.