فيسبوك
واتساب
للأمانة
كلنا طالعين نقولها بأعلى صوت
لا للخيانه
كلنا طالعين نموت
والموت عشانك مش إهانه
كلنا طالعين وحبك
هوّ كارنيه الحصانه
*****
للأمانه
كلنا طالعين بعزم ودم فاير
م المبانى البوص
ومن طوب العماير
نرفض اللى ما قولناهوش فى نهار يناير
كلنا طالعين عشان نرسم دواير
ع الوشوش الكالحه والجتت الجبانه
*****
للأمانه
كلنا طالعين نقف ضد المؤامره
القلوب صافيه ودهب
والبشره سمره
والعيون تِسْكِر ولا أجدعها خمره
والشفايف تمره للمعده الجعانه
*****
للأمانه
كلنا طالعين نقولها بأعلى صوت
لا للخيانه
واللى مش عارف يُعرّف
واللى كان غايب يشرّف
واللى مش عايز يخرّف
ييجى ويقول لأ معانا
الشاعر سعيد شحاتة
