شروق السيد تكتب: ورقة وقلم

ورقة وقلم وكتاب كبييييير وفى كل سطر غُنا وعويل
وذكريات وحاجات كتيير ....
قلبى الصغير كان أمير فى الحب كان عصفور ضرير
ورقة وقلم وكلام كتيييير وذكريات قلب انحرق مع كل تنتوفة ورق كان له حكاية فى كل سطر بين الورق حبر اندلق شوه معالم الحروف وتاهت بين السطور معانى بالألوف
بين الكتاب كان الورق وبين الورق قلب اتحرق مع وردة دبلانة حزينة مكسورة منسية سجينة تاهت فى زحمة السنين ونسيتها مع باقى الورق وفى الورق قلب اتحرق
مع كل ورقاية اترسم قلب اتوشم حرفين وسهم اترشق مع معنى أكبر من الكلام واغلى حتى من الورق غرق الورق فى الحبر إلى اندلق
مع كل ضحكاية حزينة مع كل دمعاية رزينة بين الورق حرف اتخلق
مع كل دمعة وكل اهه بين الورق قلب اتحرق
مع كل ذكرى فى كل وادى مع كل حادى وكل بادى بين الورق زمن اتخلق
مع كل لحظاية تمر مع كل آه وكل مر دبِل الورق قدِم الكلام ما عاد يفيد الاهتمام ما هو الورق أصله ورق ومع الزمن دبِل اتنسى جف القلم خلص الكلام وانتهى ورجعت ادور ع الكتاب أصلى نسيت قلبى فى طيات الورق ومع الورق قلبى انحرق والوردة غرقت فى الحبر إلى اندلق ...
ضاع الورق ومعاه قلبى اِنحرق ووردة دبلت من الغرق ضاااع الورق ضااع الورق