نور الدين محمد يكتب: رسالة من شهيدة فى ميدان التحرير

فى وسط الميدان الكبير اتقابلنا
مكناش صحاب لكن كان بيجمع ما بينا السكات..
وشقيت سكاتى بكلمة سلام.. وبدأ الكلام..!!
قالتلى حجات وقلت حجات...
حجات فكرتنى بشكلى المبهدل..
وشعرى المنعكش ولبسى الغريب..
وطعم الكلام فالأغانى الكئيب ...
ولحظات تقلب ساعات فيه سعادة ساعات وشى يقلب
وكان التفاهم ما بينا عجيب..
وقطع الهتاف حبال الكلام
بدأنا بهتافنا لسقوط النظام
وفجأة لقيتها بتبعد وتبعد
عنيا عليها وشفايفى بتهتف
وحبة بحبة صورتها بتضعف وصوتها بيضعف
وفيه شىء بيخطف منها الحياة..
وطلعت رصاصة...!!! طااااااااخ ...
سمعت ساعتها فودنى الصراخ
كأنه مظاهرة فقلب المظاهرة ..
جريت واترميت جمب إنسانة طاهرة
بتعشق تراب البلد دى بجد حاولت أنادى ..يا ناااس !!! الحقونا ...!!! يا ناس أى حد ...
لقيتها بلمسة ايديها البريئة
بتلمس ايديا فآخر دقيقة
وبتقولى قوم وكمل تظاهر
وكمل هتاف وقول الحقيقة
وقول للتاريخ إن مصر فيناير ولادها مهربوش وسابوا الميدان ....