رامى محمد زين يكتب: حتى لما ثارت الجيران... ما أعتبرتش منّها

حتى لما ثارت الجيران ... ما أعتبرتش منّها

بقى كنت فاكرنى جبان ... ومش هعمل زيها

مصر لسه فيها جدعان ... وبتطلب حقها

حتى لما ثارت الجيران ... ما أعتبرتش منّها

جيران تانيه غيرها ... وزعت على ولادها كتير

وقالت أطفّى غليلها ... وأعيد من تانى التفكير

وأنت يااللى شربت من نفس النيل ... وبتتكلم عربى

ليه بتعمل سمعك تقيل ... لما بتسمع مطالبى

وده حالك من زمان ... وحاجه ما بستغربش منّها

حتى لما ثارت الجيران ... ما أعتبرتش منّها

والنهارده ملقتش غير ... بالعافيه أسمّعك

وأطالب بالتغيير ... ولو كلامى هيوجعك

هتكلم خلاص ... سكوتى ما عدتش ينفع

ولا حتى الرصاص ... هيمنع صوتى يطلع

كلمه جوه منى محبوسه من زمان ...
آن الأوان دلوقتى أفتح لها

حتى لما ثارت الجيران ... ما أعتبرتش منّها

غلّيت عليّا قوتى ... وكتمت فيّا صوتى

غير قله المهيه ... وزياده المحسوبيه

وحاجات تانيه كمان ... أعتقد سمعت عنّها

حتى لما ثارت الجيران ... ما أعتبرتش منّها