إبراهيم عطا الله يكتب: ف ميدان كبير

تسمع بودنك صوت هدير
تشوف بعينك شئ خطير
خرج الشباب يحلم بخير
خرج ينادى بأعلى حس للتغيير
هب النظام وطلق نفير
قام الحرس يضرب كتير
يقتل وينهب بدون تفكير

ف ميدان كبير
صوت القنابل والرصاص مطر غزير
وكله صامد ف الميدان شهيق زفير
طلع البعيد يخطب ف ناسه كلام حقير
دى أجندة جاهزة.. دول حمير
الصوت بيعلى ف الميدان كما الزئير
صوت الشباب جوة الصدور لا للرئيس.. لا للوزير


ف ميدان كبير
وقف التاريخ يشهد خروج فرعون أخير
قواتنا واقفة تحمى شعبها بلا تكدير
رحل النظام.. قال الشباب.. دى مصر غير
صدح الادان ف العالى ربنا كبير
رفعوا المصاحف ويا الصليب بلا تكفير

ف ميدان التحرير
صباح عفى مليان أمل من غير تكشير
صباح بيضحك لجل مصر تكون بخير
رقص العلم بكل فخر.. ده كان أسير
صفحة سودة وانطوت باالم مرير
شهداء وماتوا ف حضنها ب إيدين خبير
روت دماهم أرضها ف ميدان كبير
ميدان كبير ما يتنسى.. واسمه ميدان التحرير