صادق عوض صادق يكتب: المقامة التحريرية

فى يوم من أيام البرد القارس
قامت فى بلدى ثورة يقودها مليون فارس
قلت من دول يا ناس دى وجوه غريبة
قالوا دول شباب مصر الحبيبة

قاموا طول الليل من غير خيام وشعارهم واحد - يسقط النظام - قلت يريدون الخراب والعشوائية قالوا لأ أفهم يا غبى قصدنا مبارك وأعوانه الحرامية حاولت الحكومة ردهم عن عزائمهم وهم مصممين على إجابة مطالبهم اجتمع الحزب الوطنى لبحث الموضوع، وفى نظرهم أن تدميرهم أمر مشروع قال الرئيس: "فيه حل يا ناس؟، قالوا جميعا أنت فين يا ريس! ألف لا بأس قال الكهنة جات لنا فكرة نحاربهم بالجمال والخيول ونخرجهم من ميدان التحرير بشكل لم يسبق له نظير، واللى ما يخرجش هنبطحه بالطوب ونحرقهم بالملتوف ونجعل منهم وجبة اسمها البلولبيف.

انتفض الرئيس وقال: دى فكرة جهنمية جبتوها منين يا ولاد الحرامية؟

قالوا: أبعتوا يلا بسرعة هاتوهم وبالطوب والنار أرجموهم يا أهل الهرم ونزلة السمان يركبون الخيول والحمير والجمال كما قالوا لو إحنا خرجناهم من التحرير لنا أجر يا بيه. قال طبعا لكل واحد منكم خمسين جنيه. راح البلطجية للتحرير مسرعين وفى نظرهم أنهم أكيد منتصرين قابلهم الشباب بعزيمة قوية ليه لأ وهم شيفين قدامهم الحرية رجع البلطجية منكسين الرؤوس بعد ما خسروا كل الفلوس، بعدها خضع النظام الفاسد، وعرف أنه قريبا سيصبح بائدا وظل الشباب البطل صامدا فى ميدان التحرير يهتف مصر بعد 25 يناير.