"جدير بالذكر" قصيدة للشاعر خليل عز الدين

فى البلاد الفايرة من كل اتجاه

صعب تتحقق نبوءة.. بالحياة

مستحيل حرب الأهالى

تفرض المعنى المرادف للهوية

وفـ خيالهم: المناقشة/

خطوة يلزمها السلاح..

اعترافهم بالمقاومة

واختلافهم ع الصباح

خلوا موج الفتنة قادر ع التمادى..

-الأهالى بيقفلوا صدورهم

كماين للغريب..

يسجدوا للخوف إيماناً باللى

عادى-...



فوضوية انتمائهم.. شرخ بيفك

الشوارع...

- والشوارع مش غريبة عنُّهم..

ليها قِلِّة الاختيار،

عمرها مرهون بلحظة إنفجار..

بتقاسمهم عشقهم غز العلالى

باللى أبعد م النظر،

بتقاسمهم حزنهم/ خيبة أملهم

لما بيزول الأثر،

بتقاسمهم طعم موتهم

واختلاطهم جوة تغريبة حصار-





صمت..

وتمُر الجرايد.. تصبغ الأحداث جمودها،

- أسبوعيا ً- تنفى أخبار الخلل..

- الأمان الجاىّ من فخ الجرايد.. مفتعل-

"سائِت الأحوال

وبكرة.. بكرة..

والأيام تفوت

مهما يعلى الصوت/

ينادى/ ينطِلِق/ يوصل.. يموت"

يستمر الصبر..

لكن شئ بينذرهُم بـ نار

. . . .

يسمعوا بـ حظر التجول/

تترسم دهشة جديدة

مع بداية الانتظار...

- دهشة الخوف/ المفاجئة ليها

تأثيرها المضاعف ع البشر-

لون عرقهُم ع السلالم..

رمز فاضح

لانتفاضة يأس عايم فـ الوجوه

- يأس أبعد من حدود المعرفة

يمتلك طاقة مساومة ع النهار-

والمواجهة

عمرها ما تصيب هدفها

إلا لو فَلَت العيار



وصفهُم بـ "دُعاة جريمة"

أشعل الموقِف سريعاً،

خَلَّى خطوات المناوشة

تكتسب شكل الصراع/

إعتصام فـِ زحام بيهرب

من زمام السيطرة/

المرارة اللى فـ سكوتهم

أجبرتهم

يكرهوا فرض السياج..

يبقى لما تشيل كفوفهُم

لوحة تصرخ بـ احتجاج

تبقى ريح الرفض هَبِّت

من لقى الـ (لام( للـ (ألِف(/

من قساوة لفظ

خارج عن إطار المكرفون/

من سنين الاحتياج...



صمت..

وتمُر الكتيبة..

تبتدى تبيِّن مهارتها فـِ جذب الانتباه/

تسرق الأنظار وتسعى

–سعى تنفيذ الأوامر-

والغرض.. "فَض الجموع"

-البُكا مبقاش فـِ حاجة

لـ قنبلة تسيِّل دموع-

العساكر.. إستيعابهم للحدث

مأمورية ضد قِلّة

-قِلّة بتشُكّ الثبات-...

الكتايب كل دورها

محض إجهاض للطوائ..

والنجوم -خيرة رجالها-

ليها تهديدها المثالى

-النجوم بتسيح

إذا قربلها دم الأهالى