قصيدة "الميــدان" للشاعر الكبيرعبدالرحمن الأبنودى

أيادى مصرية سمرا ليها فى التمييز
ممدودة وسط الزئير بتكسر البراويز
سطوع لصوت الجموع شوف مصر تحت الشمس
آن الأوان ترحلى يا دولة العواجيز!
> > >
عواجيز شداد مسعورين أكلوا بلدنا أكل
ويشبهوا بعضهم نهم وخسة وشكل
طلع الشباب البديع قلبوا خريفها ربيع
وحققوا المعجزة صحوا القتيل من القتل
> > >
اقتلنى قتلى ما هيعيد دولتك تانى
بكتب بدمى حياة تانية لأوطانى
دمى ده ولا الربيع الاتنين بلون أخضر
وببتسم من سعادتى ولا أحزانى
> > >
تحاولوا ما تحاولوا ما تشوفوا وطن غيره
سلبتوا دم الوطن وبشمتو من خيره
أحلامنا بكرانا أصغر ضحكة على شفة
شفتوش الصياد يا خلق بيقتله طيره
> > >
السوس بينخر وسارح تحت أشرافك
فرحان بيهم كنت وشايلهم على كتافك
وأما أهالينا من زرعوا وبنوا وصنعوا
كانوا مداس ليك ولولادك وأحلافك
> > >
ويا مصر يا مصر أنا العليل رجعتله أنفاسه
وباس جبين الوطن مال الوطن باسه
من قبل موته بيوم صحوه أولاده
إن كان سبب علته محبته لناسه!
> > >
الثورة فيضان قديم محبوس مشافوش زول
الثورة لو جد متبانش فى كلام أو قول
تحلب وتعجن فى سرية تفور فى القلب
وتنغزل فتلة فتلة فى ضمير النول
> > >
متخافش على مصر يابا مصر محروسة
حتى من التهمة دى اللى فينا مدسوسة
ولو انت أبوها بصحيح وخايف عليها قوى
تركتها ليه بدن بتنخره السوسة؟
> > >
وبيسرقوك يا الوطن قدامنا عينى عينك
ينده بقوة الوطن ويقوللى قوم فينك؟
ضحكت علينا الكتب بعدت بنا عنك
لولا ولادنا اللى قاموا يسددوا دينك
> > >
لكن خلاص يا وطن صحيت جموع الخلق
قبضوا على الشمس بإيديهم وقالوا لأ
من المستحيل يفرطوا عقد الوطن تانى
والكدب تانى محال يلبس قناع الحق!
> > >
بكل حب الحياة خوط فى دم أخوك
قول انت مين للى باعوا حلمنا وباعوك
وأهانوك وذلوك ولعبوا قمار بأحلامك
نيران هتافك تحرر صحبك الممسوك
> > >
يرجعلها صوتها مصر تعود ملامحها
تاخد مكانها القديم والكون يصالحها
عشرات سنين تسكنوا بالكدب فى عروقنا
والدنيا متقدمة ومصر مطرحها
> > >
كتبتوا أول سطور فى صفحة الثورة
وهما علم وخبرة مداورة ومناورة
وقعتوا فرعون هرب من قلب تمثاله
لكن جيوشه مازالوا بيحلموا ببكرة
> > >
صباح حقيقى ودرس جديد أوى فى الرفض
أتارى للشمس صوت وأتارى للأرض نبض
تانى معاكم رجعنا نحب كلمة مصر
تانى معاكم رجعنا نحب ضحكة بعض!
> > >
مين كان يقول ابننا يطلع من النفق
دى صرخة ولا غنى وده دم ولا شفق
أتاريها حاجة بسيطة الثورة يا إخواننا
مين اللى شافها كدة مين أول اللى بدأ؟
> > >
مش دول شبابنا اللى قالوا كرهوا أوطانهم؟!
ولبسنا توب الحداد وبعدنا أوى عنهم؟!
هما اللى قاموا النهارده يشعلوا الثورة
ويصنفوا الخلق مين عانهم ومين خانهم!
> > >
يادى الميدان اللى حضن الذكرى وصهرها
يادى الميدان اللى فتن الخلق وسحرها
يادى الميدان اللى غاب اسمه كتير عنه وصبرها
ما بين عباد عاشقة وعباد كارهة
> > >
شباب كان الميدان أهله وعناوينه
ولا فى الميدان نسكافيه ولا كابتشينو
خدوده عرفوا جمال النوم على الأسفلت
والموت عارفهم أوى وهما عارفينه!
> > >
لا الظلم هين يا ناس ولا الشباب قاصر
مهما حاصرتوا الميدان عمره ما يتحاصر
فكرتنى يا الميدان بزمان وسحر زمان
فكرتنى بأغلى أيام فى زمن ناصر!
> > >
شايل حياتك على كفك صغير السن
ليل بعد يوم المعاناة وإنت مش بتئن
حمل المحامل وانت غض بتعجب
إمتى عرفت النضال؟ اسمحلى حاجة تجن!
> > >
أتاريك جميل يا وطن مازلت وحتبقى
زال الضباب وانفجرت بأعلى صوت: لأه
حرضتنا نبتسم ودفعت أنت الحساب
وبنبتسم بس بسمة طالعة بمشقة
> > >
فينك يا صبح الكرامة لما البشر هانوا
وأهل مصر الأصيلة اتخانوا واتهانوا
بنشترى العزة تانى والتمن غالى
فتح الوطن للجميع قلبه وأحضانه!
> > >
الثورة غيض الأمل وغنوة الثوار
الليل إذا خانه لونه يتقلب لنهار
ضج الضجيج بالندا إصحى يا فجر الناس
فينك يا صوت الغلابة وضحكة الأنفار؟!
> > >
وإحنا وراهم أساتذة خايبة تتعلم
إزاى نحب الوطن وامتى نتكلم
لما طال الصدى قلبنا ويئسنا من فتحه
قلب الوطن قبلكم كان خاوى ومضلم!
> > >
أولنا فى لسة الجولة ورا جولة
ده سوس بينخر يا أبويا فى جسد دولة
أيوه الملك صار كتابة إنما أبدا
لو عينّا غفلت لحظة حيقلبوا العملة
> > >
لكن خوفى مازال جوه الفؤاد يكبش
الخوف اللى ساكن شقوق القلب ومعشش
واللى مش راح يسيبه ولسه هيبقوا
وهيلاقولهم سكك وببان ما تتردش
> > >
وحاسبوا أوى من الديابة اللى فى وسطيكم
وإلا تبقى الخيانة منكم .. فيكم
الضحك على البق بس الرك على النيات
فيهم عدوين أشد من اللى حواليكم!