مبروك على الموج
اللى طاير بلهفة
يحضن الميه
مبروك على الوقت
اللى عدى
أحلامه اللى جاية
مبروك لحب الناس
لدينها
وحبهم لإسكندرية
مبروك على البرد
اللى كان فى يناير
راكية الثوار
مبروك على الجرس
اللى بيبلغ أدان العصر
تحت النار
مبروك بلون الورد
وبريحة النهار
مبروك بطعم اللمة
والقعدة الهنية
والحكايات
مبروك على الحنة
وع الزفة
وع الزغاريد
وع الشربات
مبروك على المطرب
وع المنشد
وع الراوي
وع النحات
اليوم بحمد الله
سقط "عبد المنعم الشحات"
قالوا السما
هتدي صوتها لحزبنا
واللي هيرفض
يبقى بيرفض ربنا
إحنا الطريق
ولافيش طريق غير من هنا
إحنا القضاء
واحنا القدر
إحنا السمع
وإحنا البصر
وإحنا الأمان
وإحنا الخطــــــــــر
خربوا الحياة
دنيا ودين
بكلام يجنن
و"غزوة الصناديق"
قالت لشحاتهم
يحنـــــــــــــــن
تصبح
على خيرك
على مصر
الأصيلة بيك
يا عم نجيب
تصبح على الموال
على الأرغول
على جنة
تليق بأديــــب
أنت اللى اسمك
بالخلود
مكتوب على سقف السما
واللى هانوك
آخر خيالهم السراديب
تصبح على نور ربنا
يا عم نجيب..
