سيد احمد الهمشرى يكتب: لجنة الانتخاب

والله حاجة جميلة وقفة الطوابير
ولجنة الانتخاب جمّعت ما بين أمير وغفيـر
الصوت أمانه وراحوا الناس يؤدوها
خلونى بطلت أقول عايز أبيع طراطير
......
خمس ساعات والبشر على اللجان واقفين
والدنيا تشتى عليهم لكن تقول يا مين
اللجنة والمستشار قاعدين على صندوق
يتيم كأنه بييجى من بلاد الصين
......
هايجرى إيه لو عملنا كمان خمس صناديـق؟
وحافظنا على نفسنا من زحمة المخاليق؟
كان يوم كفايه قوى الناس تصوت فيـه
بدال ما يبقى الطابور شاغل رصيف وطريق
......
أمانة اللى يشوف مسئول غبى يقوله
إن كان حبيبك عسل ماتلحسوش كله
حرام المواطن يقف عشر ساعات فى طابور
علشان يقول كلمته اللجنة بتزله!
......
مرة وعدت ولسة تانى فيه تصويت
والشعب كله خلاص بطل قعاد فى البيت
لازم تكون اللجان فيها عشر صناديـق
ومعدش صوت فى البلد ثمنه قزازة زيت
......
بعد النهاردة خلاص معدش فيه تزوير
ومعدش فيه ميتين راح ييجوا تانى كتير
ومعدش فيه بلطجى هايقفل الصناديق
خلاص شباب البلد عازم على التغييـر
......