ادلى بصوتك من غير لحمة
تمن الكيلو رأس فى الوحلة
وعمر ما بلدك ترجع أحلى
ويقف الكيلو عليك بكتير
****
خليك حر وادلى بصوتك
خنت بلادك يا ما بسكوتك
اوع الفرصة يا صاحبى تفوتك
مش عايزين نفضل طراطير
****
إوع تقولى عجوز وعجوزة
وصوتك ميت ومالوش عوزة
لساك عافى وبتشرب جوزة
ولسه فى صوتك كل الخير
****
إوع تقول زهقان م الزحمة
إدعى لربك يبعت رحمة
افرح حس إن إنت فى رحلة
هدفك ترجع منها بخير
****
إوع تقول موجود تزوير
ومهما عملنا مفيش تغير
خلى النية يا عمنا خير
واللى عليك اعمله بضمير
****
لو قررت إن إنت تطنش
بحجة إن صوتك متهمش
يبقى ح قول بس ما تتغمش
إنت بتكره لينا الخير
****
إوع تقول أنا ما تعلمتش
صعبة القايمة أو ما فهمتش
اسأل ابنك لو ما عرفتش
وابنك عنده أكيد تفسير
****
اختار واحد فكرة سليم
قلبه حنين شاب حليم
موجود بينكو وبيكو عليم
وعمرة ما فكر يبقى أمير
****
متصدقش كلام مت سكر
كل الشعب فى دمه السكر
واللى يقولك شاى أو سكر
قولة فارقنا بدون تفكير
****
واللى يوضح ليك مظروف
قوله اتمشى بعيد يا خروف
رغم ظروفى أنا ليك مكسوف
ورب العرش عليه التدبير
****
أوع ترجع كرسى الماضى
حفنة وعُدها كلام فى الفاضى
كل غرضها فلوس وأراضى
وشلة تقوله تمام يا كبير
****
ذنب شهيد الثورة فى صوتك
أوع تبيعه ولو على موتك
فكر مين يستاهل صوتك
لازم يبقى الصوت بضمير
صورة أرشيفية
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة