فيسبوك
واتساب
بقالى سنين غياب
عن لجنة الانتخاب
وأول ما حسيت إن صوتى
هيتعمله خلاص حساب
رحت ووقفت طابور
ف نظام وأنا راضى مسرور
وفضلت مستنى شويه
لحد ماجه عليّا الدور
رحت ع اللجنه دخلت
ومضيت ف الكشف وسحبت
ورقتين ودخلت ورا ساتر
وعلامة جنب اختيارى كتبت
وخدت الورق بكل هدوء
ورحت رايح عند الصندوق
وطبقته نصين ودخلته
ف الفتحة الموجودة من فوق
وقبل ما اخرج حطيت صباعى
ف سائل أزرق صناعى
ودى كانت آخر خطوة
ف خطوات التصويت بتاعى
ومن وقتها ماتتصوريش يابلادى
أد إيه فرحتى إنى بقيت إيجابى
ووعد منى يالجنة الانتخاب
مش هتحسى تانى بغيابى
صورة ارشيفية
