راضى على حسين يكتب: مش هانتخبك

مش هانتخبك مش هاختارك علشان عارف طعم مرارك
ظـَهـَرت لينا كل عمايــــلك بانت كل جميع أســــرارك
قبل الصوت تحضن وتبوس جاى تخدعنا بفن هـزارك
خدت الفرصة هَربْت بعـيد واحنا نلفلف خلف مـدارك
نصرخ نبكى من أوجاعـنا تحكى وتشكى لينا أعذارك
تحت القبة بتنسى همومــنا تنهب قوتنا وتبنى ف دارك
تشخط فينا مع التكشيــــرة عايز تضرب فينا بنـــارك
تسقيع أرض وألفين قرض طول الدورة ما شفنا غبارك
ياما خنت العهد بتاعـــــك ونسيت أهلك حتى وجارك
ياما زرعت الشوك ف طريقنا وتعزف باطل على أوتارك
كنت توافق كنت تنــــافق علشان تمضى بس قرارك
عايز نجمك يرجـــع تانى غدرك دمـَّر شمس نهارك
جاى دلوقتى تقول متندم؟! إمتى المكر هيمسح عارك؟1
جاى دلوقتى عايز أصواتنا شوف مين فينا راح يختارك