لواء متقاعد محمد كشك يكتب: ومضات من عقل رجل شارع

* كل يوم أصطبح بأخبار عن البلطجية... والفلول.. وسكس إبريل.... وأولاد الشوارع... أقول: منك لله يامبارك.
* المصيبة أحسن يكون حد لحس دماغ العيال دى... وفهمهم إن اللى يموت وهو بيحرق أو بيدمر يبقى شهيد .... آلوووووو يامشايخ.

* لو أنكرت أنا إن كان فيه تجاوز فى تعامل الجيش مع المعتصمين ابقى منافق، ولو أنكرت أنت أن تصرفات المعتصمين تجاوزت الحدود ووصلت لدرجة الدلع الماسخ اللى مالوش لازمه يبقى أنت أفاق ومخادع وانانى وجبان، لأنك ببساطة لو مقتنع بموقفهم يبقى عيب عليك قوى إنك تعتمد على أولاد فى عمر أولادك أو إخواتك الصغار أن هما اللى بجيبولك حقك المسلوب، وأنت قاعد بتتفرج ع التليفزيون وبتاكل فيشار.
* مجلس استشارى إيه وهباب إيه، دول ناس تخلت عن المركب مع أول طارئ يحصل طيب، ينفع بابا يسيب البيت علشان اكتشف إن أخويا بيشرب سجابر مثلا.
* ياااااااااااااااااااااااااه .... أما النخبة عندنا جبنا بشكل...... طب حتى كلمه حق واحدة علشان خاطر ربنا.
* أما المجلس الاستشارى دا طلع حته نكته.................
* وأنا بادور عن أسباب إن رئيس الوزراء مش عارف يدخل مكتبه، اكتشفت أن الواد كعبوره (14 سنة)، والبنت هياتم سفنجة (13 سنة ) مالهومش مزاج... والنخبة بتشترى خاطرهم.
‎* عشرات آلالاف يحتشدون لتأييد المجلس العسكرى فى العباسية..... الظاهر كده والله أعلم إن حزب الكنبة .......... قرر.... يبيع الكنبة.
‎* الواد ابن الجيران بيسألنى من يومين، مين الجنزورى دا ياعمو؟... النهارده شايل يافطة كبيرة ... لا للجنزورى... عجبى.
* أحد الثوار يرفض عرضاً للجنزورى بتولى حقيبة وزارية، أما عرضوه على جهاز قراءة الأفكار طلعت الورقة دى "ثورى واتفض، أحسن من وزير واتنفض".
* رغم بغضى لأعضاء المجلس العسكرى.... باعلن تأييدى له حتى تسليم إداره البلاد لسلطة شرعية منتخبة، بصمة وخاتم (رجل شارع).