فاطمة المرسى تكتب: أصل الهدف واحد

أصل الهدف واحد
والخصام بين مين ومين
لما الجسد واحد
هو الصدام بين إيه وإيه
لما الطريق واحد
ليه القلوب متفرقين
لما الحبيب واحد
الشمس قسموها حتت
والنور صبح باهت
نادى المنادى ع البلد
يتجمعوا بنت وولد
يلا ارفعوا تانى الأدان
وما تسيبوش أرض الميدان
الثورة فى ودانكم حلق
هو اللى خان واللى سرق
زى اللى صان واللى صدق
ما تلخبطوش كل الورق
أصل المصير واحد
لما افتقرقنا على الطرق
كل الحدادى اتجمعوا
من كل ناحية ومفترق
يحتفلوا بميلاد الخطر
والموج حاوطنا بالغرق
ونادينا يا وااااااحد
رد الشهيد الحى
يسال يا أهل الحى
إيه يعنى ثورى تنسرق
إيه يعنى دمى يندعق
إيه يعنى قلب الأمهات اللى انحرق
هو اللى مستنى السما
تشتى عليه سلوى ومن
يقدر يحرر يوم وطن؟؟
وإلا الطيور فى الفضا ممكن تسبح يوم وثن
بالعتمة زارعين الدروب والأمكنة
ولا حد عاد شايف يعدى من الزحام
وضجيج وغربة مؤلمة
والصوت ماهوش واحد
من بين شطوط الخوف
لو عدنا لحظة لعقلنا هنشوف
عيال بتجرى صغيرة
ماسكين خيوط النور
بالدم حفروا للمذلة قبور
فى الصخر نحتوا بالإرادة والعزيمة زهور
حالفين يجيبوا للحقيقة عبور
عبور ينور كل سكة ممكنة
وخطاوى ماشيه على الطريق متمكنة
كل الآبدين متجمعين
رافعين علم
لكن علم واحد