ربط الفيل بره الباب
لبس العمة والقبقاب
لجل نقفل ع الموضوع
فات لنا مبلغ جوا جواب
أصلنا شعب وبيتعلم
بعد ما شاب
إن العيشة ف ضل الحيطة
عيشه عذاب
وإن الفتة من غير لحمة
تبقى كباب
لجل ما ننسى فات لنا مبلغ
جوا جواب
لجل ما نسكت ولا نطنش
وتبقى الثورة بس.. عتاب
جاب لنا فتوى شبه الناب
لجل ما تغرس جوا عقولنا
وتبقى الثورة أمل كداب
هى حياتنا يا خلق سراب!؟
ولا ضميرنا نبيعه
بورقة ومبلغ جوا جواب!؟
ولا نقفل ع الموضوع بس...
راعونا ينوبكوا ثواب
هى تكيه ولا نهيبه
ولا رواية ف قلب كتاب!!
والله ثورة.. غصباً عنكم
راح ننهيها بالقبقاب
طول مالفيل جوا العلبة
والحرامية بره الباب
مش راح نهدى ولاّ نطنش
كفاية يا خلق نكح تراب
راعوا ضميركوا
لجل ينوبكوا فينا ثواب
واتقوا دعوه كهل فقير
راح يشكيكوا للتواب
هى قضيه ولا متاهة
ولا حمار جوا دولاب !!
لجل نخش ف حسبه برما
ولا تفوت لنا مبلغ جوا جواب
صورة أرشيفية
مشاركة
اضف تعليقاً واقرأ تعليقات القراء
مشاركة
