سعدو السبعاوى يكتب: يا ولدى.. بلّغ سلامى لمصر

سلملى يا ابنى على مصر أم الخير
وقلّها مشتاق بس إيدى قصيرة
أول الحب أنتى، وأنتى حبى الأخير
واللى ما بين ده وده، حب فالصو وعيره
بحبك يا مصر ، واللى يغير يغير
هو أنتى حبك يهزه حقد وغيره
اللى يراهن على أنه يبقى الكبير
قوليله يمكن ، بس بعد الكبيرة
مصر اللى كانت واللى بكرة تصير
زى مالتاريخ قال ، والأثر والسيرة
أمك يا دنيا ، بتعشق التعمير
تزرع وتبنى ، فلاحة لكن أميرة
بتحب دايما، وتتمنى لها وللغير
أمن وسلام، والعدل راية المسيرة
والحق ويّا الكرامة مايقبلوش تحوير
هم أساسك يامصر، وهم البصر والبصيرة
بحبك يامصر ، يا نجمة فوق بتطير
يابسمة حلوة ، والحالة ضنك وعسيرة
يا نسمة هادية ونادية، يا شدو الطير
يبات جعان، ويصبح يغنى لحبة شعيرة
يا صبيه فى عينى سنبلة وغدير
يا بهية لو بالجلابية ، يا ملكة لو عالحصيرة

سلملى يا ابنى على مصر أم الخير
وقلّها فرقتها صعبة ومريرة
وعشقك يامصر يمكن مالوش تفسير
لكنه فى دمى ، وروحى لعشقك أسيرة
على ضهر أرضك حبايبى وكلهم تقدير
وفى بطن أرضك ضنايا ، راحتها الأخيرة

سلملى على كل مصرى فى ميدان تحرير
وقلّه الأهم خلينا أهل وعشيرة
هو فى مقهور بيكره التغيير
بس للأحسن ..
مش دم يجرى، والنية شريرة
بالوحدة طول عمرنا ..
أقوى من المقادير
والفتنة كدبة ..
وحبالك ياكدب قصيرة

سلملى على جورج صاحبك ..
ووالده نظير
وطنط مارى ..
دول كانو أحلى جيرة
وقلّه ياجورج ..
فاكر لما كنت صغير
ده انت معانا فى كل تصويره
كان العيال فاكرينكو توأم ..
وعم بدير
يقول دول (مسليحيين) ..
وخالتك منيره
بتقول ام جورج فى سبوعك
رسمت صليب ودير
وامك فى سبوع جورج
ادّنت فى ودانه اعلى تكبيره

سلملى يا ابنى على مصر
كبير وصغير
ماهو الصُغيّر بيكبر
والدنيا دنيا غروره
واكم من غنى
فى لحظه يبقى فقير
واكم من غنى بالمال
ونفسه فقيره
ومصر هى مصر
بالعز هى البشير
وبالذل للجبار واللى افترى نذيره

سلملى يا ابنى على مصر ام الخير
ومتقلّهاش السلام من مين ..
هى بحبيبها خبيره
انا الّى غنيت اسمها ..
عشق مش تنظير
وحلمى ارجع اضمها ..
وانا الّى افك الضفيره