"هى" قصيدة جديدة لماهر مهران

مراية السّما
هى
زهزهة الورد فوق الأرض
هى
بيت الأوليا
وهى
نعومة ملمس النسيم للورد
هى
حضن فاير فى السقيع
وهى حلاوة الجنون
لمّا ينطلق م العقل ..
هى البطن اللى شال العدل ..
وهى الشفق اللى بينام فوق طراطيف النخيل
والبطة العايمة على وشك يا نيل
وجبنة رواها الزمن بالحمار
هى ملبن يتقطم قطم
وهى الأبيض م الحليب
والأطعم من الجّمار
وهى السّكرالدايب جوة سنابل القمح
هى شجرة فاكهة تقل عليها الطرح
وهى غواية الرسل
والخصوبة اللى ساكنة فى الحصى
وهى دلع الحروف
والشهامة وقت الخوف
والعيش والملح
وهى بت صعيدية
ع ترقص حافية على ضهرالزمن
هى لوزة قطن رشّوها بعطرالورد
هى مفتاح الجنة
وخزانة الأرض
وهى شمس فى الشتا دافية
هى السما الصافية
وحلاوة القصب
وبسمة العيال ع العتب
وريحة اللمون
وهى اللى من زمااااااااااااااااااااااان
نصبوّها ملكة جمال الكون
وهى بطنها
عجين قمح م الخمران
هى ريحة الرغفان
وهى صوت عبدالباسط
فى ليل رمضان
وهى صوت حنون
تقولشى زبدة سايحة من خزانة المعبد
للكنيسة
لمقام الشيخ سالمان
وهى الحمرة زى زهرة الرومان
والسمرة زى الكحل
والبيضة زى نيتها
هى العطروالألوان
وهى مرسى الدنيا بعدالطوفان
وهى برتقان حادق
والكف اللى سابق
ومحور الأعجاز
هى الحكمة ماشية بالعكاز
والدلع لو تحضر
أخضر يابكرة أخضر
هى قمر فى الملاية اللف ماشى يتمخطر
يلوحنا يلوحنا
يدوخنا مايروّحنا
هى عقلنا وروحنا
وهى دايما بهجة الشارع
وهى بنت القصور اللى ع تبص ع الأنهار
هى البطن
اللى مابتشيلش غير أحرار
وهى العنيفة أعنف من الأعصار
وهى نوّاربينوّرطول الفصول
هى لذة الحرف
وروعة الأرغول
وريحة العطارين
والخصوبة اللى ساكنة الحصى والطين
وهى
حريرفى الملمس
وهى
شجاعة أحمس
وهى المزيكا لما تمشى تتسرسب فى غيطى
هى الحياة لوتشرب معاك الشاى
وهى
شجن الناى
وصلابة العود على الترعة
هى غزالة ع تتمرمغ فى الزرعة
وهى
قمرة لو هلّت
هاتداوى المكفوفين م العمى
وهى
أرتكاز الأرض
ومراية السما