فيسبوك
واتساب
وعُــوده كتيرة وفيها أحلام
كان بيقوللى أحلى كــلام
ولمَّا بينجح يقسى علـينا
حتى ما رد علينا سلام
صوته هادى كمان ورقيق
ودعايته مالية كل طريق
ولمَّا بينجح ينسى همومنا
وأزمة لحمة معاها دقيق
بيجى يعزى حزين بجد
يبكى ويمسح دمع الخــد
ولمَّا بينجح نلقى سراب
كإنه ما يعرف فينا حـد
**
كان بيخلَّـى الجو عطير
حياتنا هتبقى كباب وفطير
ولمَّا بينجح يجى يسافر
وكل كلامنا معاه بيطـــــير
أنا محتار بجد حقيقى
كان بيقوللى أنت صديقى
ولمـَّا بينجح كله اتغير
أطلب خدمه ينشف ريقى
بيقول أنتوا أهلى وناسى
جميلكم شايله أنا فوق راسى
ولمَّا بينجح نجرى وراه
طلباتنا ياخدها ويروح ناســى
ياما إدانا حضن وبـوس
وماشى بيدى غلابة فلوس
مشاكلنا بجد عارفها فين
ويجى فوق الجرح يـدوس
يخطب لينا يصول ويجول
هتاكلوا لحمة بدل الفـول
ولمَّا بينجح نبعت شكوى
نلاقى الرد علينا يطــــول
قبل العيد يبعت لى تهانى
عمرى ما رايح أبقى أنانـــى
ينجح ألاقى قريبه اتوظف
ويسيبنى فقير لوحدى أعانى
كان بيزورنا ليل ونهار
ويقول خدمة أهلى شعار
ولمَّا بينجح أطلب حقى
ألاقى دليلى معاه احتـــار
صورة أرشيفية
