سامى النويهى يكتب: أول عيد

راجــــــع بعـــــــــد صلاة العيد
راجـــــــع بــاكى وفكرى شريد
ضاقت بيــــــــــا الدنيا وحاسس
إنـــــى بقيت فــــــى الدنيا وحيد

أول عيــــد بيعـدى عليا
وانتى يــا أمى مش حواليا
أول عيد مارتاحش فى حضنك
ولا ح تـــــدفى ايـــــديكى ايديا

كنتى يـــــــــاأمى العيد والفرحة
كنت بنام علــــى حبك واصحى
بعــــــد رحيـــــــلك بسأل نفسى
ح أهــدى لمين الشال والطرحة

كنتـــــى أحـــــن وأطيب قلب
واتحملتى الزمـــن الصعب
شيلتى جبـــــال الهم وقـــــدرك
تبقـــــــى الأم وتبقـــــــــى الأب

قلبك كـــــــان إنسان يسمعنــــى
ومفيش بعـــــدك حضن يساعنى
ومفيش غيرك حـــــــد أشكى له
م اللى تــــاعبنى واللى واجعنى

وسط الناس وبعيش وحـــــــدانى
وماغبتيش عــن بـــــــالى ثوانى
وساعات قبل مــــا انـام أتخيل
أول ما اصحى ح اشوفك تــانى

بعدك أعلن قلبـــــــى حــــــــداد
صعبة العيشة ومــــر الـــــــــزاد
بعدك مــــــات الفــــرح ف قلبى
ونسيت كلمــة اسمها أعيـــــــــاد

روحتى وخـــــدتى البركة معاكى
وبيوحشنى يــا غالية دعـــــاكى
انتى يـــــاأمى هناك فـــــى الجنة
وأنـــــــــا بتمنى أكـــون ويــاكى