فيسبوك
واتساب
تدخل رهان على مين يشيل
يشيل همومه ويمشى بيها طريق طويل
وتتنقل من جيل لجيل
يضحك فى يومه كأن عمره ما كان زليل
ولا كَـل قليل
تدخل رهان على مين يسوق
فى ضلمة كحلة.. فى وسط سوق
والحالة جيم من سوء لسوء
وف قلبه حاجة بتقول له حاجة
يا واد مسيرها تحلى وتروق
تدخل رهان على مين يعوم
من غير هدوم
لِـبر متغطى بغيوم
فى بحر هايج طوب وشوم
ولما تتعب رعشته
يونسه عَـد النجوم
تدخل رهان على نجم غيَّر دورته
عشان فى وسط الكون يبان
على غول ونمله جَـرِّتُـه
لسجن بين أربع حيطان
على شعب أجِّـل ثورته
لما يعدى المزلقان
تدخل رهان؟
تدخل رهان؟
صورة أرشيفية
