راضى على حسين يكتب: الوطن أصبح غنيمة

لو بيت أبــــوك خرب = اجرى خدلك منه قــالب
والوطن دمه بينـــزف = والفئات عايزين مطالب
والفلول عايزه تعـــود = قاعدة تصنع فى المقالب
والكل بيقول بس نفسى = والذئاب رافعة المخـالب
واللى غيَّر جلــد توبه = ساب شريكه بمالنا هارب
واللى راسم حلـم ذاته = والفيران صبحت تعالب
والوطن أصبح غنيمة = واللى خاين ليه مــــآرب
نفسه البلد تصبح خراب = نفسه تبقى حقول تجارِب
واللى كان ينهب ويسرق = جاى يقول لفساد هحارب
واللى زارع شوك وفتنة = واللى بيربى العقـــــارب
واللى لابس ميت قناع = حاطط سموم جوا المشارب
نفسه مصر فى يوم تتوه = والكل يبقى لفوضى جالب
دا الوطن مجروح بيصرخ = والجو غيم مليان كهارب
والأعادى قاعده ترصد = عايزه الشموس تصبح مغارب
بس الوطن رايح يعيش = والفلول دى صفر سالب
والوطن لو مُوجُه يعلى = أرواحنا تبقى ألف قـارب
دا الوطن طـاهر ترابه = والله لكل الشر غـــــالب