حسام محمد كامل يكتب: اقرأ التاريخ

اقرأ التاريخ
أقرأ السياسية
تعرف اللى كان
و تفهم اللى جاى
بفطنة وحنكة وكياسة

اقرأ التاريخ
اقرأ السياسية
من تسعين سنة
أعرف الأخبار
حكاوى وقصص صراع سياسى
وسابق على السلطة والكراسى
دى قصص فيها العبرة وزيادة

كانت السياسية فى مصر زمان
أحزاب ودستور
وملك وبرلمان
ومندوب سامى محتل بلدنا
بقوة الطغيان
والاعيب بشوات ووإغتيالات
ورصاص كمان

وفلاح بلدنا راجل مسكين
عقله تايه بين أحرار ووفديين
أحزاب تقوله الدنيا
وجماعة تقوله الدين
و البرلمان سبب الصراع
وعمله فى دماغه صداع
وفى الصندوق صوته ضاع
ما لازم يصوت لصحاب الطين

شوف كام وزارة أتشكلت
عدلى وثروت وصدقى وسعد
احرار دستوريين ويا الوفد
وكل حزب وله نواب
وكل نايب ليه أحباب
تطلب تسأل مش عايزة جواب
غير أنها تأخد خير البلد

الملك بيحارب الدستور
خايف أنه عليه يجور
فلعب بالأحزاب شطرنج
نقله شرق ونقله غرب
وأوقات تهديد وأوقات ضرب
ما هو ده شغل التفريق

حسن نشأت صنعه الملك
عايزه فى المجلس وتد
يعطل الدستور
يحرك الوزرا
بمفتاح وزمبلك

و فى أغسطس مات زغلول
و الناس رايحة جاية تقول
مين زيه يكون غول
فى وش الإنجليز

وراح سعد وجيه محمود
و سافر يعمل معاهده
و الناس منتظرة وقاعدة
الإحتلال عن بلدنا يزول
والوفد قال أنا مش مسؤول
مادمت على الكرسى مش قاعد
وعن السلطة إيدى بعيد

دى كانت فترة من الزمان
معروفة مش محتاجة حسبان
و فى التاريخ ليها مكان
أرجع واقرأ اللى جرى

ودى كل ما مصر تقول قدام
الحزب اللى بره السلطة يقول لورا
بقت حرب كلام فى كلام
وشغلة غيظ ومنظرة

مصطفى كامل كان صاحب الظاهرة
أول من طلع الطلاب فى مظاهرة
تهتف وتنادى بحقوقنا الظاهرة
عايزين مصر من تانى
ترجع لولدها نقية وطاهرة

دى حكمة واسمعها تانى
ما دام الصراع على الكراسي
هتفوت سنين عايشين فى مآسى
و نبكى ونقول زماننا قاسى
ما إحنا اللى بصرعنا بدأنا
و بالحرية ما صدقنا
نخرب بيوتنا بإدينا قبل أعدائنا