حسن العربى يكتب: حكاية جناينى

كان فيه أمل عندى.. إن الربيع حايدوم
صحيت لاقيت وردى.. بيجف يوم عن يوم

وجناينى قال: "عندك".. أنا هارعى بستانك
ده شأنى موش شأنك.. خليك فى دُكَّانك
اصرف على أهلك.. بيع واشترى كيانك
يومين وهاندهلك.. إدينى عنوانك

شهرين بقوا ستة.. بالضغط والسكتة
والشيلة والنَكتة..
مليون بيان.. طرطق ودان.. قطَّع لسان
ساب الفيران ترعى وبقت فَـتَّــة

شهرين بقوا تسعة.. نار الميدان خِسعة
لا قرصة ولا لسعة..
فض الميدان.. كسَّر عيدان.. خَوِّن.. أدان
نشر الديدان.. بِسُلطته الواسعة

وردى إللى مات اتنسى.. أما السليم انداس
نهارى ليلى ف أسى.. ما بين عزا وقُدَّاس

ليه الزهور تتلم.. والعُشب ليه يتساب
والليلة قلبت غم.. إيه تُهـمِـتك يا شباب

ياعم يا خطاط.. غيرت لى الأسماء
الترزى بقى خياط.. والداء بقى الشيخ داء

يا عم يا راعى سجل هنا الطلبات :

اكتب على إزازة مبيد "شربات"
والنقض سميه "قذف ومسبات"
خلى الولد ينخرص فى الحبس لما يبات
دى الفولة لو لَـسَـنَـت تكبر وتبقى نبات

دم الشهيد دا ولَّلا كان صبغة
وللا شهادة العيان ناقصة ورق دمغة
اكتب على ضهر الحمار نابغة

اكتب على الأقزام "هامات"
اكتب على حقى "هِـبات"

سيب العفونة زى ما هى.. وغيَّر اللافتات
ورُش بوية عالوطن واكتب "شتات"

اكتب على جنينتى "مقابر شرذمات"
و دُق شاهد رُخام، واكتب "هنا يرقد سُخام"
واطلب لنا الرحمة وقول كلمات
دى الرحمة جايزة عاللى عايش وإللى مات
على شعب فرقع م السُكات
على شعب ظأطط بالفُتات
وأنا كل دول
أنا ناس بتضحك فى الكوارث والنوبات
أنا الأسى والأمنيات.. أنا العزا والأمسيات

لابِـد فى روحى والنَـفَـس مكتوم
ما عِـدمتش الحيلة وأنا المرحوم

حانسج وليدى من الرُفات.. حايقوم
يِنَـفَّـض العصر إللى فات.. يا هموم

همِّى جناينى عض نفس البِز
وهمِّى يرجع لى الوقار والعز
خد يا بنى إيدى.. انتفض وأفِّـز
يدق قلبك.. انطرب وأهِّز
صوتك بياتى وخطوتك مقسوم
الفحنى على كتفك وعوم
لبر آمن فيه ربيع بيدوم