سيد أحمد الهمشرى يكتب: بنزين ثمانين

راح فين يا ولاد بنزين ثمانين؟ وقولولى خرطوم الجاز مع مين
ومين المسئول اللى نحاسبــوه عن ذ ٌل وقهر المصرييــــــــــن
اشمعنى الغاز اسم الله عليــــه بعتوه المتر بربع جنيـــــــــــــه
لمصانع عز ابو عيشه تلــــــز أستاذ وعميد المحتكريــــــــــــن
راح فين يا ولاد بنزين ثمانين ؟
واشمعنى وفرتوا البنزيـــــــن تسعين وكمان تسعه وتسعيـــــن
علشان تفويل العربيــــــــــات اللى اصحابها يملكوا ملاييـــــن
وكمان يملكوا أجمل شليهـــات فى مارينا واحلى المنتجعــــات
وفى شرم هناك جنب المخلوع على ريش نعام نايمين قايميـــــن
راح فين يا ولاد بنزين ثمانين؟
بنزين ثمانين خلانى حزيـــــن عربيتى مركونه من شهريـــــــن
زعلانه من دلع العربيــــــــات بتاع البشوات رايحين جاييــــــن
وشبح وعيون اسم الله عليـــــك تخطف ببريقها حبابى عنيـــــــك
وهامر الوان اوبشانها جنـــــان بتموّن من دم الملاييــــــــــــــــن
راح فين ياولاد بنزين ثمانين؟
سواق التاكسى عايز جنيهيــــن يتوفروا من ثمن البنزيـــــــــــــن
وعليه اقساط وماضيها شيكـات علشان العربيات بالديــــــــــــــن
لو فات القسط ومدفعهــــــــوش تلقاه تايه زى المرعـــــــــــــوش
علشان الشيك لو مدفعهـــــــوش هايبات فى القسم مع المساجيــــن
راح فين ياولاد بنزين ثمانين؟
ياولاد خليكوا معايا صاحييــــن الأزمه سببها فلول قاعديــــــــــن
ودلع بشوات زى الضبـــــــــاط و رموز الحكم المنتفعيــــــــــــن
واديكوا شايفين شكل الاحكــــام ولا خطوه هاتتحرك قــــــــــــدام
وآدى دقنى اذا حد سأل فينـــــــا وادانا لترين بنزين ثمانيـــــــــــن
راح فين ياولاد بنزين ثمانين؟