خالد الصاوى: دماء البشر وكرامتهم فوق أى بورصة

كتب الفنان خالد الصاوى على صفحته الرسمية بموقع الفيس بوك يدعو للظالمين أن يشفيهم ربنا من الظلم ومن حب الجلادين، حيث كتب "لما انت كنت ضحية لإعلام الدولة أثناء ثورة يناير كنت مخدوع، ولما اتخدعت أيام الاستفتاء كنت طيب، ولما ضحكوا عليك وحموا مبارك وعصابة طرة من بطش الناس كنت غير حكيم، ولما فضوا البلد من الأمن ونزلولك المجرمين اللى كلنا شفناهم بيؤجروهم فى الانتخابات ولزقوها فى الثورة كنت ساذج، ولما ضحكوا عليك فى أحداث سفارة إسرائيل ثم ماسبيرو كنت إنسان إشتغالة، إنما لما تشوف بعينيك سيناريو التحرير من أول ما ضربوا ميتين مصاب بيحتجوا على جنب لحد ما بقى فيه ناس بيتقتلوا ويتسحلوا ويترموا فى الزبالة وتقوللى انك مصدق الروايات الرسمية.. تبقى انت اتغيرت فعلا وبقيت إنسان شرير".

وأضاف "دماء البشر وكرامتهم فوق أى بورصة وقبل أى برلمان، فالحل بس تغمض عينيك من بشاعة اللى حصل مع القذافى ولما تشوف امتهان ابن بلدك بعينيك تنحاز للجانب الظالم! ده انت عيان بقى بحب الجلادين!!! ربنا ينور بصيرتك ويشفيك من بذرة الظلم قبل ما تنتشر جواك وتدمرك".