د. هانى أبوالفتوح يكتب: مِيدانْ وِنَارْ وِدُخَانْ !

ميدانْ ونارْ ودخانْ
وبارود فى كُل مكان
وزمان غير الزمن ده
كفاية عليك يا زمان
مصر الحبيبة الغالية
عَايشه على بُركان

واحد هناك فى وسطنا
بِيْغِشنا مُشْ مِننا
واحد بيحرق فى البلد
إِحرق هنا.. وَلَّع هنا
واحد بيحرق دمنا
وراية سودة بِتِعْلا فوق
وإحنا هناك
وِسْط الحريقة بْنِتْحَرق
والبلد تِتْباع فى سُوق

فين الضمير يِشْتِرى
وفين اللى باع
دم اللى جاع
لسه بينطق من بعيد
يا بلد
رُوحى اكتبى كِلمة وداع

رُوحى احرقى كُتُبْ التاريخ
اللى كتير كَتَبِتْ عليك
رُوحى امسحى شَعْرِك
واغسلى دمعة عنيك
روحى اكْدِبى
قولى ولادى ما بيحرقوش
واللى اتحرق رَمْيَاه اِيديكْ
مَلُهْش لازمة يتحفظ
ولا نِذْكُره ولا نِكْتِبُه
ولا حتى نعرف مَذهبه

عَدِّيتْ عليكى فى يوم غَريب
قلت أشوف مين اللى صاحبك
ومين عَدِوْك
ومين حَبيب
لقيت ولادك بيخنقوك
ولقيت مفيش فيهم طبيب
ولقيت مُنَاهُم يِقْتلوك
ويورثوك ويْقَسِموك
ويِإْفِلوا نجمك ياغالية
ويتِْمَنُّوا لو شمسك تغيب

خلاص بقت فوضى كبيرة
الكل سَاب
ومفيش رقيب
ومفيش حساب
ومفيش ضمير نِسْأَله
إيه اللى ناوى يعمله
مات الضمير فينا خلاص
مستنيين ساعة العزا
قِيموا الحداد
خلوا الجنازة كلها
بطول البلاد
ماتت بهية من زمان
من يوم ماضاع فيها الأمان
من يوم ماباعوا أرضها
ودلوقتى ساكنين الليمان
.......................
بس الزمان
بيقول يادنيا مستحيل
بهية لايمكن تموت!!!
مهما يطول فيها السكوت
بهية واقفة هناك بعيد
تستنى جيل من بعد جيل
بتقول هييجى يوم أكيد
وابْنِى الحقيقى ياخد بإيدى
تِرُدْ روحى من جديد
ويرتوى صدرى العليل
مهما تصومى يا بهية
الصوم بِييجِى بعده عيد
بكرة تشوف يا زمن
وبكرة هَتْغَنْى يا نِيلْ
ياسين .. الطفل الوليد
جاى وهيرد الجِميل!!!
واللهِ هَيْرُد الجِميل!!!