"العسكرى فرعون جديد".. قصيدة جديدة للشاعر محمد السيد

حواديت كتير اتمثلت
ومفيش نهاية مقنعة
سقطت جميع الأقنعة
ورواية الحلم ابتدت
تخرج عن النص الصريح
شبح الكلاب
طالل من الوادى المريح
لسه الأفاعى فى الجحور المُعلنة
والحاوى عامل مش هنا
رغم إن فيه
جمهور جريح
اتلم امله مع الألم؛ بسؤال جديد
إيه الجديد؟
الطير جناحه بيتربط لسه فى حديد
لسه العبيد
عايشين عبيد بالاقتناع
كل اللى فاضل يعلنوها على المشاع
إن اللى خان كان مشترى
وان اللى مات هو اللى باع
بالذمة مين المستفيد؟

..
العسكرى فرعون جديد؟
وللا اللى فات هو الملك؟
وللا احنا شعب بزمبلك
يؤمر نطيع
يشخط نبيع؟
معقول يكون لسه القطيع..
عايشين قطيع
وفرحانين بالمألسه
والأبلسة
والملعنه؟
لسه الامانى ممكنة
وللا انتو ايه
مبتزهقوش
من قطفكم ورد الربيع؟
احنا اللى قدمنا التمن
حتى السما تشهد لنا
إن اللى مات كان من هنا
والأرض برضه حنينة
وتشهد معاه
هى اللى حضنت ضحكت
وقفلت عنيه
هى اللى عارفه وصيته
كانت بإيه
والأرض قدامكوا اقنوعها بكدبكم
بس الورود الجاية عارفه
هتعمل ايه ؟!!!