رامى محمد زين يكتب: تحية لأبويا وأمى

تحيه لأبويا وأمى
اللى ياما شالوا همى
واللى مهما كتبت فيهم
فعاجز عن الشكر قلمى
تحيه لأمى اللى شالتنى
ف بطنها وربتنى
واللى كانت بتحابى عليّا
وعمرها يوم ماضرتنى
تحيه لأمى اللى كبّرت
واللى غدت وفطّرت
واللى دوقتنى كتير من حنانها
واللى عن مصلحتى يوم ما اتأخرت
تحيه لأمى اللى ذاكرتلى
واللى غسلتلى هدومى وغيرتلى
واللى ياما خدتنى من إيديا
وحاجات حلوة ولعب جابتلى
تحيه لأبويا برضه
اللى علمنى أصلى الفرض بفرضه
واللى علمنى أساعد الغلبان
وأقف على قد ما أقدر جنبه
تحيه لأبويا كمان
اللى ربانى وأنا صغير زمان
على إن الرجولة مواقف
والشده بتبين الجدعان
تحية لأبويا اللى ياما لاعبنى
ونزل لسنى وسمع منى وصاحبنى
واللى لما كنت بعمل حاجه كويسه كان بيكافئنى
واللى لما كنت بغلط كان بيحاسبنى
تحيه لأبويا اللى إشترالى
شقة جوازى وجهزهالى
واللى لما كنت بقع ف أزمة
كان بيقف جنبى ويحلهالى
تحيه لأبويا وأمى من جوه منى
تحيه ليهم ويارب يكونوا سامعينى
وبدعى زى ما بتعامل معاهم
بنفس الطريقه إبنى بكره يعاملنى