أكتر من عشرين سنة يا بلادى..
بعيد متغرب
يوم ورا يوم بيْعَدى
أتمنى البُعد يقرب
وأما أشوف صورتك قدامى
أحس بروحى بِتُنفُضْ جوه عروقى
وأحس بقلبى... يدق... يدق...
أقول أنا جسمى اِتكهرب
مش هيحس بطعم الغربة
إلا حقيقى... من عاش واتغرب
أكتر من عشرين سنة يا بلادى...
بعيد متغرب
عارفه أما انزل إجازة وأجيلك
أبقى ساعتها طاير م الفرحة
وأفضل طول السكة أدعيلك
كل منايا فى وقت وصولى...
أجرى عليك بالحضن وأشيلك
وأفضل ماشى... ماشى...
بين أراضيك... وبين لياليك
أفرح بيك... أشرب من نيلك
وأفضل طول الليل... سهران
جوه شوارعك.. نفسى احكيلك
إزاى بعدك أثر فيا
وإزاى حبك نار... واشكيلك
وأما معاد طيارتى يِِقَرب
أفضل أأجل... أأجل... أأجل
علشان أفضل أقول مواويلك
أحكى زمان وأنا لسه صغير
بَلْعَبْ فوق أرضك.. ونجيلك
واحكى وأنا بَدْرِسْ وأتعلم
وإنتى سَمَاكِى عليا مِضَلل
وأما الدنيا تِضَلِم مرة...
تجرى بسرعة تقيد قناديلك
علمتينى... ونورتينى
أبداً عمرى ما أنسى جميلك
...........................................
مصر يا غالية يا أم الدنيا ب أحبك.. أحبك
حتى فى حبك كل الناس دايماً حَسْدينى
صورة بلدى قدام عينى أشوفها دموعى
تفضل تنزل غصبن عنى
وأما أشوف علمك أُدامى
أحس بروحى بترجع تانى
ما انتى العين... وهو النِنْى
كل أغانى الوطن أعشقها وأحب أسمعها
وعارف لما اسمعها وأقولها أكيد تِأْلِمنى
بتفكرنى.. بوطنى.. ببيتى.. بشارعى..
بأبويا الغالى.. وأمى حبيبتى..
وكل الناس عندك... واحشينِى
طيب شوفى دلوقتى.. إزاى بَكْتِب لك
وبحر دموع.. غصبن عنى.. بينزل مِنْى
.......................................................
عايش فى الغربة... أحس بروحى يتيم... ووحيد
إوعى تقولى دا شغلى واخدنى أو متهنى.. ولْلا سعيد
غصبن عنى إن أنا متغرب.. دا قدر الله كاتبه بمواعيد
إحنا اتنين حبيبين افترقوا... وقت رجوعهم هو العيد
بحلم يجِى اليوم وأرجع لك
ونعيش تانى فى حب جديد
بس الخوف جوايا قاتلنى
عارفه يا غالية.. إيه مخوفنى.. وإيه إللى قاتلنى؟
خايف أموت وأنا لسه بعيد
أمانة عليكوا ما يحضن جسدى إلا بلادى ورمل بلادى
وبَدْعِى يا رب تِحقق أملى...
وحدك تفعل اللى تِشَاؤا.. واللى تِريدْ
مشاركة
اضف تعليقاً واقرأ تعليقات القراء
مشاركة
