فيسبوك
واتساب
أنا جيت لك ومتأخر
ياريت تعذرنى وتقدر
قطعت الدنيا من ديلها
لحد الراس
وجيت عندك ومتحرر
وليه بنبص فى الساعة
دوام ماشية
وعمرعقارب الساعة ما بتأخر
وعمر الساعة ما توقف ولا ثانية
تعد الوقت باللحظة
عشان نوصل
قدر مكتوب
ويا ريت الدنيا تمنحنا
لو لحظة
عشان ما نتوب
و نرمى حمول
منشالة على الأكتاف
تخف ذنوب
ونتوضا ونتطهر
ف ماء طاهر ومتطهر
من بطن الأرض متفجر
لطفل رضيع عايز شفطة
تبل الريق
وامه بتسعى من الخضة
بتجرى مرة وتهرول
ومرة تبطأ السرعة
تدور له على نقطة
دا طفل بريئ
دى لحظة صحيح كانت فارقة
وقلب الأم م الغرقة
فضل يسعي
سبع أشواط
واحنا أهه لازم نسعي
نلبى ونخلص النية
وتحت تلراس كانت مية
نزلت منها أتوضا
وكلى حماس
وبرغم وصولى متأخر
يا ريت يارب تغفرلي
أنا والناس
صورة ارشيفية
