فيسبوك
واتساب
يا وابور الساعة اتناشر رجعنى على التحرير
من يوم الثــورة ما قامت وما حستش بتغيير
وجعوا دماغنا بحاوراتهم
خنقـــــــونا بمنــــاورتهم
أحلامنــا غير خــــرافتهم والفرق مابينا كبير
ياوابور الحال ف بلدنا بقى زى اللوغريتمات
ولا جيبنا حـق ولادنا ولا بــان للخير علامات
إزاى ندخـــل ف معاهدة
على إيه نستنى ونهدى
وأزاى يرتاحوا الشهدا لو ماحصلش التطهير
ياوابور الساعة اتناشر خلصنا الصبر خــــلاص
لا لمحنـــا فجــر مقرب ولا فيه م العتمة خلاص
قلنــــا ح نطلــــــع ونجيبه
ماهو مش ممكن حنسيبه
واللـى مــآمن بنصيبه مايخــافش من التحذير
ياوابور الساعة اتناشر تلتين العمر أهو ضــاع
زارعين الخير ف دروبها مابنجنيش إلا ضيــــاع
ياوابور أخدوها أسيرة
ولا جابوا عنّـها سـيرة
صبحت أرواحنـا كسيرة ومادقناش طعم الخير
ياوابور الســاعة اتناشر إحنا تعبنا وملينا
وكبـــرنا ف عين الدنيا بس ف عينهم قلينا
سجنونا وسرقوا آمــلنا
قتلوا الأحـلام ف خيالنا
طب ح نقول أيه لعيالنا ده حسابنا حيبقى عسير
ياوابور الساعة اتناشر بيقولوا إن أنا مستعجل
وأنا عايش عمــــر بحاله عمال ف الحلم بأجل
ولا كل تأنى سلامة
ولا كل العجلة ندامة
ربك ورانى عــــلامة ودا إنـــــذار ليــــا أخيــــر
ياوابور الســاعة اتناشر ودينى على الميـدان
إخواتى هناك وأنا نفسى بينهم ألحقلى مكان
ياوابور وحشتنا اللمـة
فرَقنا اللى مايتسمـى
وأنــــا مش راجع غير لمـــا يتحـــرر حلم أسير
ياوابور ف الوضع الراهن الموت بقى يسوى حياه
واللى علـى العسكر راهن حتموت أحلامه معاه
مش رح اطبطب وأغازل
ولا ح أقبــل تانى أتنازل
أنا ســايب أهلى ونازل علشان أحـدد لى مصير
نتقابل فى التحرير!!
الشاعر أشرف الشافعى
