عصام شرف يا حبيبى أنت فين أراضيـــك
من يوم ما سيبت الميدان وأنا بنادى عليــك
وكل يوم التقيك عن الولاد مشغـــــــــــــول
مشغول بإيه والأمل حاطينه كله فيــــك؟
.......
مش دا اتفاقنا زمان اللى اتفقنا عليـــــــــــه
غيرت ليه الكلام ونسيت حبايبك ليـــــــه؟
بيقولوا إنك بقيت العبد للمأمـــــــــــــــور!
وكمان ملكشى مكان ولا كرسى تقعد فيـه!
.......
لو الحكاية كده سيب المكان وامشــــــــــى
خليك ياراجل جدع وانطق ماتسكوتشـــــى
خلينا نقدر نشوف كل الورق مع ميـــــــــن
ولا أنت يعنى كمان هاتقول ماتعرفشــــى!
.......
إحنا صبرنا عليك شهرين ورا شهريـــــــن
لما اتحرق دمنا وولادنا فى الزنازيــــــــن
هانقوم بثورة ونطلع للميدان تانــــــــــــــى
يا تقول لنا باختصار اللى مرازينا ميــــــن؟
.......
الصبر طال والأمل خايف لابكره يضيـــــع
ولو يضيع الأمل بكره هايبقى فظيــــــــــــع
تتساوى فيه الحكاية بين الحياة والمـــــــوت
وساعتها مش راح يفيد اللى انقطع ترقيـــــع
.......
يا (عصام) كتاب التاريخ فاتح عليك صفحـات
وناوى يكتب (عصام) كان حى لكن مــــــــات
وضيّع اللى الشباب أمنوه ف ليله عليــــــــــــه
كان عنده فرصة وضاعت بين خنوع وسُكـات
.......
سيد احمد الهمشرى
عصام شرف
مشاركة
اضف تعليقاً واقرأ تعليقات القراء
مشاركة
