ثلاث ورقات
هاتعلم لعب الكوتشينــــــــــة الكومى وثلث ورقــــــــات
واتعلم ايدى تبقى خفيفــــــــة وسريعة زى الملقـــــــــاط
واتسحب زى التعبـــــــــــان واتعلم فن الزوغــــــــــــان
وهارشح نفسى للمجلــــــــس الدورة الجاية بالـــــــــــذات
......
وهاطوّل دقنى واربيهــــــــــا واصبغها وممكن احنيهـــــا
وهافصل خمسين قفطــــــــان واغسل سجدتى وهاكويهــا
علشان راح اخوض انتخابات محتاجه شوية حركــــــــات
وهاخش المجلس بالعافيـــــــه وراح اكتب فيها يا هاخفيهــا
......
واتعلم كام كلمه سياســــــــــة واتكلم باسم الإسلام
وهاشوفلى قناة ولا اتنيــــــــن واظهر فى وسائل الإعلام
وهافرق لحمه مع الزيــــــــت ف المسجد وكمان فى البيــت
مش ياما على كرسى المجلـس وحصانه هاتنفع قـــــــــــــدام
......
وهاشوف الثورة راحت فيــــن واسبقها فى كل المياديــــــــن
وانصبلى منصه واعليهـــــــــا وادبح قدامها خروفيـــــــــــن
والعلم المصرى هاعليــــــــــه واتحزم وارقص تحتيــــــــــه
زى الاعضاء تحت القبـــــــــة ساعة ما يقولوا موافقيـــــــــن
......
ما هو أصل الموجه الايـــام دى محتاجة شطارة وكياســــــــة
محتاجة حبة حركـــــــــــــــات وكمان محتاجة حبه غلاســـة
وكمان محتاجة التربيـــــــــــط وشقاوة وحبة تنطيــــــــــــــط
وضميرك تديلوا بالجزمـــــــــة وتحط عليه عشره حراســــــه
......
والثورة لازم اسرقهـــــــــــــــا ما هو كل الأحزاب سرقوهــــا
وان حكمت لازم اركبهـــــــــــا واسوقها زى ما ركبوهـــــــــا
وهاماطل زى التحقيــــــــــــــق ما هو تاية بين ألف طريــــــــق
وهاخبى النية الوحشـــــــــــــــة زى حُكامنا ما خبوهــــــــــــــا
......
هاتعلم لعب الكوتشينـــــــــه ملعون الشطرنج ولعبـــــــــه
قرفتنى عساكره ووزيـــره إن ش الله ينشك ف قلبـــــــــــه
والكومى لو كان هايقُــــــش راح أقف له علشان مايجورش
و الواد هاياخد بأيد الشايــب ويساعده والبنت تحبـــــــــــــه
......
صورة ارشيفية
مشاركة
اضف تعليقاً واقرأ تعليقات القراء
مشاركة
