رامى محمد زين يكتب: محتاج أدى نفسى فرصه أحبك

الأحد، 13 نوفمبر 2011 08:48 ص

صورة أرشيفية

محتاج أدى نفسى فرصة أحبك
محتاج أحس أكتر بقربك
محتاج أحس إن أنت أمى
وإنى فعلاً بجد أبقى ابنك

محتاج أحس إنك وحشانى
محتاج أشوفك وأركز تانى
ف كل حتة ف ملامحك
وأشوف الحاجات اللى كانت فايتانى

محتاج أمشى ف شوارعك
وأجرى بين غيطانك وزرعك
محتاج أبطل شويه كلام
وأقعد يا بلدى ساكت سامعك

محتاج أشوف شوية مصالحك
وأعمل اللى يا بلدى ف صالحك
محتاج أتعود لما اغلط ف حقك
أجرى يا بلدى بسرعه وأصالحك