راضى على حسين يكتب: دموع ناخب

جاى بتحضن جاى تبوس = كنت فينك من زمان؟
كنت فين واللحمة غاليـة؟ = والطماطم شىء جنان
جاى تقول ادينى صوتك = انسى قسوة واللى كان
جاى بتحلف ميت يمين = قلبى هملاه بالحنـــــــان
جاى تعيد نفس الحكايـة!= انكشف أمرك وبـــــان
كنت توعدنا تقــــــــول = لمَّا هوصل برلمــــــان
رايحة تبقى الدايرة جنة = والحلم يصبح ليه كيــان
خدت دورة وشفنا حلمك = والنتيجة شاهد عيـــــــان
كنت توعد بالمساكــــن = والجفاف يطرح عيـــدان
صار كلامك عكس نفسه = زى بيت من غير بيبـان
كنت غايـب عن همومى = زى ما تكون فى اليابان
جبت الوظايف للقرايـب = والفقير خسر الرهـــــان
كنا بنروح عند بابـــــك = نلقى ترحيب مستهــــان
حتى كل خطوط موبيلك = مرفوعة من خدمه كمــان
كنت تخطب فينا توعظ = فصيح كلامك فى البيـــان
أنتوا أهلى أنتوا ناســـى = كلكم عندى ســـــــــــــيان
جاى ومستنى نساعدك = والصوَّرمالية المكــــــــان
صوتى تاخده بإنجازاتك = مش يفط بس ف ميــــــدان
مش قماش يملا الشوارع = والفقيرعريان جعــــــان
ياما كنت تروح وتنســـى = ودمعى عندك ياما هـــان
جاى بتحضن جاى تبوس = كنت فينك من زمـــان؟