إلى المنادين بتسليم السلطة إلى مجلس رئاسى خلال أسبوع

(سيناريو)
بناء على طلب العديد من الأحزاب والائتلافات بضرورة تجريد المجلس الأعلى للقوات المسلحة من سلطاته لأنه طامع فى السلطة، وضرورة تسليم مقاليد الحكم خلال أسبوع واحد إلى المجالس الرئاسية المدنية التى ينتخبها أو يعينها الشعب، وقد ناشدت هذه الأحزاب والائتلافات العقلاء من المواطنين بضرورة العمل على تنفيذ ذلك، وبناء عليه فقد اتصل بى أحد العقلاء لتنفيذ طلب الائتلافات والأحزاب، وطلب منى أن أسلم السلطة إلى الهيئة التى سيتم انتخابها على أن يتم ذلك خلال أسبوع، وبناء على التزامى الوطنى، وبما أننى زاهد فى السلطة ولا تضيف لى سوى وجع الدماغ وقلة القيمة مع إللى يسوى وإللى ما يسواش، فقد وافقت، وأنا أقف حاليا فى ميدان التحرير وكرّْ الثوار، وقد حملت السلطة على كتفى وأنتظر من يستلمها.. لكن مضى الوقت والليل دخل ولم يحضر أحد، أعمل إيه دلوقت؟ أنا جاهز ومستنى، ماحدش جه ياخدها زى ما قلتم، حتى الثوار المعتصمين فى الميدان رفضوا استلامها، وقالوا لى دى موش بتاعتنا، دوّر على أهلها، إحنا كنا بنهزر ياريس، حد يقول حاجة، موش إللى يطلب حاجة يبقى عارف هوه بيطلب إيه. مازلت واقف بقالى ساعة ما حدش جالى ياخد السلطة وإنتو عارفين إنها ثقيلة أد إيه، ولاّ موش عارفين - حتعرفوا منين؟

مضى علىّ 3 أيام وأنا واقف مستنى اللى وعدتونى حييجى يشيل السلطة، أنا اضطريت أحطها على الأرض لأن كتفى تعب وموش قادر أرفعها. والآن مضى علىّ الأسبوع اللى حددتوه لنقل السلطة وما حدش جه برضه، وكل ما يعدى علىّ واحد ويشوف السلطة جنبى على الأرض يجرى ويهرب، الله .. موش ده إللى وجعتوا دماغنا بيه من الصبح، أدينا جبنالكم السلطة لحد عندكم زى ما طلبتم ليه ما حدش عاوز يشيلها؟ نهايته بانت لبتكم، طيب حد يشيل معايا علشان نرجعها مكانها، ماحدش عايز يساعدنى؟ أمال شاطرين فى الكلام والتنظير بس، الراجل الطيب العاقل إللى جالى فى الأول وطلب منى تسليم السلطة رجع وجالى تانى لما لقى ماحدش عاوز يشيلها، قال لى ياعم المجلس حقك علىّ، إمسحها فىّ المرة دى أنا صدّقتهم وكنت فاكر إنهم عارفين بيقولوا إيه، طلعوا موش مقدرين عاقبة إللى بيقولوه، الأمور مختلطة عليهم وكلهم بيسارعوا بالتأييد والشجب والهجوم على المجلس، حقك على أنا حأشيلها معاك، قلت له كتر خيرك ياعم العاقل.. إنت إسمك إيه بالمناسبة، قال لى إسمى المواطن الصامت الصابر إللى الأساتذة الكبار الفلاسفة أُمات ياقات بيضه بيلعبوا فى دماغى كل شوية وضيّعوا على إنتخابات البرلمان والدستور والرئيس إللى كان زمانها كلها خلصت فى شهر سبتمبر الماضى، زى ما المجلس وعد فى الاستفتاء لولا أولاد الحرام إللى موش عاوزين خير البلد أو على الأقل موش فاهمين، الثورة بتحتضر قدامهم وهما نازلين فى مناقشات فلسفية ودستورية ليس وقتها الآن، ودول بيفكرونى بالمثل إللى بيقول "موش مهم العيان مات، المهم العملية نجحت"، قلت له ياعم مواطن العاقل إرجع وبلغهم رسالة قول لهم الراجل إللى شايل السلطة بيقول لكم "أرجوكم .. أرجوكم .. لا تمتحنوا صبر المجلس والجيش".
( ستار )

• كاتب سياسى – محلل استراتيجى