آية فؤاد تكتب: ليه كده؟!

ساعات بحس إن كلنا بنقول السؤال ده كتير أوى، بس ساعات مبيبقاش ليه لازمة بس أهى أى حاجة بتتقال وخلاص، أو زى ما بيقولوا أهو كلام والسلام (بس هما مين اللى بيقولوا دول؟!).

آه معلش نسيت اعرفكوا بنفسى بس قبل ما تعرفوا أنا مين، كنت عايزة أفكركوا بكام حاجة كده الأول ويارب تفتكروها أو تحاولوا تفتكروها. فاكرين زمان لما كنا مثلا بقالنا كتير أوى مقابلناش حد وبعدين لما تقابلوا بتبقوا أنتوا الاتنين فرحانين أوى، دلوقتى الموضوع اتغير شوية هقول لكم إزاى، يعنى لو بقالنا كتير مقابلناش نفس البنى آدم ده وبعدين فجأة كده تشوفوا فى الشارع مثلا وتروح تسلم عليه وبعدين يفتكرك عايز منه حاجة مع إنك رايح تسلم عليه بس مش أكتر، طب ليه كده؟!

وعايزة أفكركوا بحاجة كمان، ساعات كده الإنسان بيصحى الصبح مزاجه حلو ويقرر إن هو هيبتسم لأى حد فى الشارع (اللى يعرفه واللى ميعرفهوش) ويبتدى يبتسم لأول بنى آدم يشوفه واللى هو ممكن يكون البواب وتلاقيه مكشر فى وشك مع إنك معملتلوش حاجة وتقول لنفسك ممكن مأخدش باله، وبعدين تبدأ تبتسم طول اليوم للناس وهما مكشرين فى وشك، ولما ترجع البيت تحس إنك عبيط أوى وممكن نظرات الناس ليك تحسسك إنك غبى!! (أنا آسفة على الكامة اللى فاتت بس دى الحقيقة)، طب ليه كده؟!

أنا مش هكتر عليكوا بقى، أنا آية فؤاد عندى 12 سنة.. فكرة الكتابة دى جاتلى وأنا بذاكر بعد أول يوم فى 6 ابتدائى.. بس أنا حسيت بفرحة كبيرة أوى وأنا بكتب اللى جوايا.. هقولكم نصيحة كده لو فى حاجة أنت عايز تعملها.. اعملها وبجد هتحس بفرحة مش طبيعية.