سامح لطف الله يكتب: موت طاغية

فين التوك توك والشمسية
فين حركات البهلوانية
تقتل شعبك ليل ونهار
وتحت الأرض بلاوى مخفية

قلبت الدنيا ف ليبيا تجارب
جبت جيوش من برة تحارب
وفلوس بترول بتفرق فيها
وقلت دا شعبى فيران وأرانب

قلت يا شعبى هتشرب مانجة
جبت لناسك صدمة وخنجة
وف نهر عظيم ترمى الملايين
وترمى الشعب فى أصعب زنجة

قلت وقلت سنين بتطول
وكتاب أخضر فكر مهول
وناس بتعانى نقص المية
والمسطول بيبيع بترول

وفلوس ليبيا فى غرب وشرق
يبعتر فيها بسرعة برق
يساند ثورة ف واق الواق
والشعب الليبى محتاج زق

قول مبروك للشعب الليبي
الحرية خلاص يا حبيبي
سنين الزنجة خلاص هتولي
يا شمس النصر ما عنتى تغيبى

ارفع علمك وارفع راسك
ابنى بسرعة يله أساسك
اوع تكون مشغول البال
بجثة ريس داس إحساسك

لحضن وطنا هترجع تاني
انسى العزلة وانسى الجاني
وابنى لبلدك عمر جديد
تعلى وتعلى ويرفع شأنى