يا كل لصوص الثورات
يا تعلب مِتسحّب فات
وف ديله شايل ألوفات
حالف هيرش الدايرة
علشان الانتخابات
طمعان فى الكرسى وشارى
وهيدفع بالدولارات
بينادى قريبى وجارى
ويبيع ليهم حكايات
وتملى بماله بيظهر
ويقول رجل الخدمات!
فى الليل بيخلى عياله
تفسِد بين الأخوات
يا كل لصوص الثورات
قد ولى زمان البشوات
وطلاق المال والسلطة
بيّن.. مفيهوش رجعات
يا فِّل وعامل ثورى
بتبيع سم فى شربات
من حركة لحركة بتجرى
مهى مفقوسة الحركات
تحريرنا ملوش أمثالك
مهمها هتعمل وقفات
مهمها هتكتب وتهلل
وهترفع فى اللوحات
لوحات تهتف وتغنى
وتقول بيه البهوات
ياللص الثورة تعبنا
منك وزهقنا سكات
وسكوتنا مهوش من خوفنا
لكن للناس مقامات
ومقام الفاهم عالي
مرفوع طول الأوقات
بتقول إن انتا سياسى
طيب فين الأَمارات ؟!
ونظامك بقه ليبرالى!
ولا نظامك ألوهات؟!
ومفوه يعنى جنابك
هنشوف منك صولات
وذا كنت نويت تتعلم
طيب فين الأدوات؟!
ولا أنت هترفع أيدك
وتروح تعمل صفقات!؟
وتكون للسلطة مخاوى
زى أمانة السياسات
لو عايز تبقى سياسى
فــ الحل تلت كلمات
قدّر - عقلية - ناخب
حقق أغلى الثورات
واعى وفاهم ومسافر
فى دروبها وفى المتاهات
أصلها مش لعبة ونزوة
وثمنها مهوش جينهات
يا لص الثورة كفاية
تاكل شهد الثورات
تقبض من دم الشهدا
وتبيع للناس شعارات
الثورة يا لص بتاعتى
وشباب الثورة اخوات
المسلم والنصرانى
لك عاملين احتياطات
إذا كان غرك فى الظاهر
تأييد بعض الحضرات
علشان بترش جنابك
لليورو وللدولارات
فأكيد من خلف ستارة
صوتهم مش ليك بالذات
وشباب الثورة مصحصح
للذئب وللغنمات
أحسنلك تعلن إنك
لعبت بيك الحسابات
وتلمْ الليلة وترحل
وبسرعة أوام فـ سكات
صورة أرشيفية
مشاركة
اضف تعليقاً واقرأ تعليقات القراء
مشاركة
اضف تعليق
تم أضافة تعليقك سوف يظهر بعد المراجعة
عدد الردود 0
بواسطة:
سامى النويهى
موافقون
عدد الردود 0
بواسطة:
Abdellatif Ahmed Fouadعبداللطيف
Good poem
عدد الردود 0
بواسطة:
من العمار
أيه يا ابني القنابل دي
عدد الردود 0
بواسطة:
نورا رعد
تسلم على ها القصيدة الحلوة كتير
عدد الردود 0
بواسطة:
ing/ magdy seliem
الكلام على مين ؟؟؟؟
عدد الردود 0
بواسطة:
حمدى
جميله جدااااااااااااا
عدد الردود 0
بواسطة:
D / mostafa el 7adry
ممتتتتتتاز جداً يا شاعر
عدد الردود 0
بواسطة:
محمد السباعى المحامى
لابد ان تغنى
عدد الردود 0
بواسطة:
ثائر مصري
عبره لمن يعتبر
عدد الردود 0
بواسطة:
احمد صلاح حماد
رائع كعادتك