د. هانى أبوالفتوح يكتب: بَهِيَةْ... !!

يا أهل البلد
مين اللى فيكوا يْدِلِّنِى
لبيت الصَبِيَة
عيونها سُودة زى لِيل
والنِنِّى دُرة فى عِنَية
والنظرة منها تْهِزِنى وتْرُجِّنِى
واللمسةَ منها حْنَينة
تِرْعِش إِيديه
قالوا عِرفنا هى مين
تُقْصُد بَهية
الله عليها وإسمها
غزال وسارح فى البرية
والطعم شَهْدْ تقول عسل
لون الحليب فى قلبها
وخدودها قالوا مْهَلَبِية
وللا القوام
فارد قُلوعه بين بحور
والنيل بيجرى ف وسطها
لو شُفتها
جنة وزهور
فوق مزهرية
والسِحْر باين من بعيد
تِسْحِر قلوب
بس القلوب حزنانة ليه
إيه القضية ؟
......................
قالوا بهية طول عمرها
متعودة عالحزن والأحزان
شوف السَمَار فى وشها
وف قلبها
هتلاقوا مِيِتْ بركان

سألوا بهية ساكنة فين؟
قالت خلاص
أنا مليش عنوان
شوف ف الشوارع هتلاقينى
وف السما
وبُصْ تحت كمان
جنب الرصيف
ماسكة رغيف
فى السيدة.. جايز
فى العَتَبَة وف حلوان
خايفة وبهرب من العيون
م السجن والسجان
ولو هتسأل عمرى كام
هتلاقى عمرى بالألوف
بس الميلاد
مولودة وسط ميدان
....................
سألوا بهية بتاكلى إيه وبتشربى؟
ردت وقالت.. لو أقول
طَبْ مين يحقق مطلبى؟
عارفين ياناس أنا طالبة إيه؟
أنا مش عروسه بيخطبوها
وبيشوفولها فى العريس
طالبة الجواز وأمسك إيديه!
طَبْ صَلوا بينا ع النبى
العدل طلبى
والحِلْمْ دينى ومذهبى
وإللى يحب عيون بهية
إن كان عجوز.. وللا صبى
يزرع لها.. ويُحصُد لها.. ويْضُمَّها
ويقول تعالى ف ملعبى
....................
هتشوفى زرع أخضر جميل
وتشوفى مَيَّة ترتوى من وسط نيل
وتشوفى شعب الطِيِبَةْ قَلْبُه مَلُوشْ مثيل
وتشوفى جيل.. طالع بيبنى المستحيل
وتشوفى كل اللى تشوفيه
بالعمل.. مش بالكلام
مَلهوش دليل
..........................
ما انتى البَهية وإنتى الصَبِية
وانتى اللى مكتوبة ف كتاب
من عند رب العالمين
محفوظ بِحفْظُه .. وبآيات
كل إللى يقرا.. يقول آمين
بس خسارة عالزمن لما يِجُور
ألفين خسارة عالسنين
لما بهية يحبسوها فى أرضها
وللا ابنها يموت مِنَّها
وللا أبوها يعيش بقيتْ عمره حزين
والطفل يِنْزِل مِنَّها
مرمى بعيد أو جنبها
مين ضمه مين؟؟
قولولى مين واقف هنا
عنده ضمير؟؟
ياخد بهية لبيتها تانى
مِطَّمِّنَة تنام عالسرير
ويكون حنين أوى ويكون أمين
ويشِيل بهية جوة صِدْرُة
وجوة قلبه وجوة عقلة
يِحْرُسْها زى الرمش صقر
بيِحْمِى عِين
لو تعرفوه.. روحوا إسألوه
ييجى قوام.. بدل الكلام
طب هو فين؟؟.. طب هو فين؟؟