طارق عبدالله يكتب : امتى يا مصر

صورة امتى يا مصر الأمن هيرجع لينا تانى
مش بقصدك لأ
أنا بقصد أمن الولاد أمن البنات أمن المعانى
امن الكلمه لما اقولها بلسانى
يعنى الكلمه متكونش سبب ظلمى وآلامى
يعنى لما اقول مخافش واعرف اقول تانى
يعنى اعبر ع اللى جوايا وأقول اللى نفسى فيه
يعنى لوشوفت غلط أقول غلط مش أدارى فيه
يعنى لو حاسس بظلم اتكلم
مش اسكت وأنا بتألم
ومن حقى كمان لما اتعب أحس براحه
ولما اشهد أشهد صراحة
مش ابقى خايف ومتكلمش
مع إنى شايف بعنيا دول
لكن بدارى ومعرفش أقول
عشان بخاف ومبتكلمش
من حقى أعرق وألاقى تمن عرقى
مش أبقى عايش مهموم أنا بقلقى
قلقان ع المعيشه ومش عارف ايه هيحصل
دا زمان بحبر وريشه كان الكلام بيوصل
دلوقتى مهما آهاتى اكنى بكلم نفسى
وخايف أقول هاتى تقولى طب أودى ايه لنفسى
وكل واحد خايف مصيره
ومش عارف بس ازاى يعيش
ولا عمر حد فكر لغيره
وشايف لنفسه وغيره مفيش
نفسى بس ف حاجه واحده
نفسى يبقى بنا وحده
وتبقى كل أحلامنا واحده
صدقنى بكره تحس الأمان
وتندم معايا ع اللى كان
من غير ما تبقى إيدينا واحدة