محمد البرديسى يكتب: المصريون مش كده ولا يمكن يكونوا كده

بداية هذا ليس شعراً ولا أقصد به شعراً
حتى لا أفهم خطأ
لكن ما كتبته مرتب بلغة الشعر وطعم الشعر
نثر خطاب وبيان م القلب
بصراحة ما حدث ف اسكندرية أكثر من مقرف! أكثر من مزعج!
إلى كل من يفهم إلى كل شامت إلى كل حاقد إلى كل حاسد
المصريون مش كده ولا يمكن ها يكونوا كده
م الآخــر إحنا لا نجيد السيارات المفخخة وشغل العراق ولبنان
احنا رغم أنف الجميع طيبين! وسنبقى على الدوام طيبين طيبين
نتظاهر صحيح نحتج صحيح نتريق صحيح!!
نعبر عن قرفنا ونغضب وفى الآخر بنضحك

لكن لا يمكن نكون كــده
إرهاب جنون يوصل لكده ولدرجة كده؟؟
لا احنا نرفض كده وألف كده
مين الجبان هذا؟؟ مين علمه شغل المفخخ؟؟

يا جماعة يا ناس يا هووه
دى مش صنعتنـــــا أبدا!
دى مش لعبتنا أبــدا
دى صنعة غريبة علينا
إحنا لا عراق ولا لبنان, رغم محبتنا للبنان والعراق
إحنا أصحاب مروءة وبســاطة وكرم وجدعنه

نحب الكورة ونهيص لها ونضحك ضحكة حلوة فى وش الغريب
لكن حركة كده زى كده بأقولها أبدا وألف لا.

وم القلب بأقول:
تسلم يا كل مسيحى
وتسلم يا كل مسلم
من كل يد غادرة
من كل خبيث من كل لئيم نفسه مصر تصير براكين

لن يفلت هذا الجبان من وسطنــا
ولو كان فى وسط ميت مليون مصرى
تسلم يا كل مسيحــى
نبكى اللى مات ونواسى اللى انصاب تسلم يا كل مسلم
نعزى بعض فى بعضنا
وبعزيمة رجال ها نقف كل لحظة ضد كل إرهــاب