آدم:
"احمينا شر النور.. وارزقنا خير الضل
اروينا زهد المطر.. والانتظار ..
الانتظار "
يا ربنا ..
الهمنى وحى الشعر ..
كل اللي ممكن ينبغي ..
لجل ارتجل.. وقت انحراف الوحي /
إلحاد الصلا ...
يا ربنا ..
كل الأسامى اتبعترت منى
لحظة سجودي والبشر.. واقفين
متربصين بال..جبل والزلزلة
وقت انكسار المئذنة.. من رشوة التراتيل ..
يا ربنا ..
كل العبيد اتمسكوا بالضل ..
ثبت خطاهم فوق صراط الذل ..
- بارك ضعفهم –
- مش بأمرك ولا بلتمس منك حاجات مش فـ استطاعتك –
ولا كان بأيدي فى المنام أسجد لهم ..
دمى اللى فاير ع الطرق.. لو يفترق عنهم يجف
لو ينطلق فيهم.. يضيع ...
.......
- إغفرلى حسن الاختيار/ الجبر –
لبيت نواح الأرض/ فتنة خلدها
راودتني.. يمكن.. راودتها ..
وأما التقتنى نبضها ..
شاركتني فى الجب انتصارى للبراح ..
..
خليها تقلع من عينيها البحر ..
وتعرى توبها وعجزها ..
خلى اغتسال الأرض.. ملح
لايق على الجرح اللى نشع فوق
سنينها وصبرها.....
خان ابتهال الفجر.. صمت المعدمين
فتح عيون الشمس.. داست شرعهم/
فشل انتظارهم فـ اختراع الأنبيا ..
- ضميني – يمكن اكتشف فيا النبوة –وقتها –
خليكى أول مؤمنة ..
سدى الفراغ اللي فـ ضلوعي.. ثبتيني ..
متضيعيش فرصة خضوعهم للخلاص ..
متشدنيش للضل ..
سانديني وقت الارتجال
- وقت انتقام الشعر.. من نثر الحياه –
سانديني وقت الاحتمال ..
- سليمان سقط – والخلق ماسكين العصا ..
ومتبتين ع الذل ..
- يا ربنا الهمنى وحى النمل
صدق البلاغة وفتنة التأويل –
في البدء قالت نملةََ
"يا أيها النمل ادخلوا "
هتمنعى شاعر.. من الحكمة؟
......
يا رب حوش ضحكتك للمولودين بعدى
احمينا من نورك لينهار الجبل ..
وينخ صلب الأبريا.. قبل اما تحبل أرضهم
- ويقسموك تركة –
إروينا زهد المطر.. علشان ما نعطش للطوفان
ساعتها مش هسأل غموض الخضر
عن خرق السفينة..
وهاسيبه يسأل عن سكوتي..
إن يستطع صبرا ً معي
تم أضافة تعليقك سوف يظهر بعد المراجعة