فيسبوك
واتساب
مين إداك الحق
تنصب ليّه ميزان
ربك هوه الحق
وإنت يا دوب إنسان
مسلم أنا أو كنت مسيحى
إيه دخل الأديان؟؟
واجه فكرى بفكرك لكن
ليه تتخفى وتبقى جبان؟؟
حقّى أكبّر ويّا إذانى
حقى أرتل جوه كنيسة
دينى ودينك ملك لربك
ليه أحلامى تبقى فريسة
ليه بتمّوت وردة عمرى
أما بجد أيادى خسيسة
عمر العنف ما حل قضية
عمر الجهل ما كان عنوان
لازم نطفى نيران الفتنة
قبل ما تآكل كل مكان
مش مقصود دمك يا مسيحى
دا المقصود كسرك يا كيان
نقطة دم بتنزف منك
تنزف مني نقطة كمان
ضم صليبك ويّا هلالى
نغزل وحده تعيش أزمان
مين إدّاك الحق
تنصب ليّه ميزان
