فيسبوك
واتساب
مين قال إنك حر؟!
دا أنت زى الخيط بيكر
أقدار بتجيبك وتوديك
تتحكم فيك
وبتصنع لك كل ظروفك
بتنسيك اسمك وحروفك
وف بحر هواها بترميك
زى الخيط بتلفك وبتطويك
وساعات بتسعِد فيك
وتحقق ليك معظم أمانيك
وساعات تزقيك المر
مين قال إنك حر؟!
دا أنت رهينة للأقدار
مرسومة خطاوى المشوار
توقيت وأُطر
ما فهش رجوع
أحيانا ً موجوع ومعطوب
وساعات بتحدف بيك بالطوب
وتكون شبعان
وف لحظة فقير ميت م الجوع
أحزان أشجان ودموع
بسمة وضحكة ونور وشموع
وغنوة فرايحى بصوت مسموع
وعسر وضيق
وطريق ببريق
للفرحة يسر
ومدار متحدد
لازم تعدى عليه وتمر
ماشى حسب الأقدار
مش ممكن تختار
إحنا زى الخيط بتطوى فينا الأيام
وساعات بتكر
مين قل إنك حر؟!
ليه تتعجل
شريط الأحداث متسجل
من أول لحظة ف حياتك
ابتساماتك وآهاتك
ومكان وزمان دفن رفاتك
مكتوب
مش ممكن منه تلاقى هروب
زى الشمس نهايتها غروب
مهما تعدى على كل دروب
لازم تتدارى خلف ستار
متصدقش الشعاويذ
والتعاويذ
واللى بيسحر واللى يجدل
كله بيلعب بالأفكار
ربك وحده هوا اللى بينفع ويضر
دنيا غريبة
عجيبة
شايفنها قريبة
بس خيال وسراب وتراب
بتخدع فيك وتضر
مليانة أسرار
ساعات بتهينك وتشينك
وساعات بتزينك
وتكون وياك
وساعات تنساك
وتبقى ف إيدك وتسيبك
ما تخدش منها إلا نصيبك
ماشين فيها زى الخيل
صبح وليل
بنشيل ف همومها
ونسحب ونجر
مين قال إنك حر؟!
أنت زى الخيط بيكر
بتطويك الأيام
وبتسرق فيك
تصحى وبتنام
لنهاية مشوارك
وتجر
مين قال إنك حر؟!
