لحساب مين؟
شباب الغد يموت
ويبقى لقمه لأى حوت
والشعب يُجبر ع السكوت
والفساد يطلع له صوت
************
لحساب مين ؟
بقرار مسئول قالوا
الغاز يتصدر لإسرائيل
وصاحب الحق لو طالوا
يُحسب عليه بجميل
**********
لحساب مين ؟
يموت جوانا الحنين
وعن حضنك نعيش أغراب
نتغرب سنين وسنين
ولا نحصد غير العذاب
***********
لحساب مين ؟
لقمة العيش فُتات
وبتيجي بسلب الكرامة
بتيجي ساعات وساعات
ما تجيش غير بالإهانة
************
لحساب مين ؟
مصرى يكسب ملايين
ومصرى ما يلاقيش مليم
رغم أن المفروض
كلنا مصريين
************
لحساب مين ؟
الكف ع الخد حال الفلاح
قاعد فى البيت حزين
يسمع حى على الفلاح
يصرخ أروح لمين
************
لحساب مين ؟
يبقى في السجون فقره أبرياء
أحولهم زى عيونهم حزينة
والغنى بكلمتين كدب ورياء
يخرج زى الشعرة م العجينة
***********
لحساب مين ؟
على نفقة الدولة
ما فيش علاج للمساكين
والغني لو قرصته نمله
الدولة تصرف عليه ملايين
**********
لحساب مين ؟
اللى بيصرخ بكلام حق
تقولوا من حزب الاشتراكية
واللى عمره ما يوم قال لأ
تقولوا عروقه مليان وطنية
***********
مش معقول كلنا خايفين
مش معقول أصبحنا فى غابة
ومات من بنا البنى آدمين
حد يرد بأى أجابة
لحساب مين ... لحساب مين ؟
صورة أرشيفية
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة