فيسبوك
واتساب
مسحرااااااتى..
بعد الصلا على كامل النور
كامل مكمَّل وأهدانا الكتاب دستور
قرآن كريم وطَهور
ساوى ما بين البشر
بدَر تقاوى التقوى
فى صحرا القلوب البور
إصحى يا فج النور
يا أبيض النيَّة
يا حاج عبد الصبور
يا بو الشقا
عرقك سقا "الطبلية"
يا مُشرقة يا بدور
آن الأوان للسحور
..............
على كتفى شلت الحجر
والدنيا عريانة
رمل وزلط واتخلط
أسمنت خرسانة
أطنان حديد يا جدع
تسد عين الشمس
من أمس أمس الأمس
أنا طايفة المعمار
صاحب يا مصر عمار
أنا المقاول وانا ريس الأنفار
فى كل شارع وحارة
نقاش مبيِّض محارة
فى البرد.. فى القيالة
غنيت مع الرجالة
ورفعت قصعة مونة
وطلعت ع السقالة
لا جيب ولا سيَّالة
ولا قلت ده مكتوب
وضربت ياما طوب
تفتح لك العتبات
وخطفت ياما قلوب
بصِّت على العمارات
القلعة والأهرامات
مطارات كبارى وموانى
ف ازاى يجيلك قلب تنسانى
وتقول دى مصر اتبنت
على يد حلوانى
واللى بناها أنا
فى الأصل واد بنَّا
شمَّر دراعه وبنى
ثم انزوى وغنَّى
موال يلف المدى
مليان قناعة ورضا
لكّن فى رجع الصدى
تسمع أكيد أنَّة !!
.................
مسحرااااااتى..
مسحرااااااتى..
مسحرااااااتى.
