محمد جمال الدين حسين يكتب: أنا شــــاب كــــــول

هو ده حالنا يا دنيا
اللى تايه واللى ضايع
واللى دايما نشتريه
يكون من كل قلبه بايع
واللى بيكون يوم شارينا
ليه تتوه عنه عنينا
يعنى هى دنيا فكس
كل حاجة بتمشى عكس
تبنى أحلامك فى بيت
والزمن يعمل ديليت
واللى طريقه دين ونور
الكل يعمله أجنور
واللى تلبس يوم نقاب
هتشوف ميت مليون عتاب
أما لو لبست محزق
ومشيت للشباب تتلزق
تبقا هى تمام وبيس
باعت نفسها بالرخيص
واللى يعمل نفسه راجل
فتلاقيه ماسك سيجارة
يمشى ف الشارع يعاكس
ف البنات ويقول شطارة
آه يا دنيا عاليكى تحت
ماشية حظ وماشية بخت
بالفلوس نعمل مظاهر
واللى جوا عكس الظاهر
الملاك جواه شيطان
وأسوة من جوا الحنان
بأدينا بنرسم صورنا
دايما ليه باصين لغيرنا
أى حد نجيب فى سيرته
وف ثانية نشوهله صورته
ونرمى على شماعة الظروف
أى هم وأى خوف
واحترام الواد لأبوه
ضاع وضاع حبه لأخوه
كله بقا بياكل فى بعضه
حلو وحش بقا زى بعضه
ناس بريئة وناس غريقة
وناس بتهرب مالحقيقة
وناس عنوانها أنا مالى
فى حالك خليك وأنا فى حالى
والقضية مفيش قضية
إحنا فل وميه ميه
واللى يوم يلعن زمانه
بأيدى هقطعله لسانه
إحنا الشباب إحنا الأمل
أفعالنا دى أحسن عمل
وليه هحرق أنا ف دمى
ما يتحرقوا أبويا وأمى
متقلش طريق ومستقبل
بأى كلام ولا هقبل
أنا أخرى قهوة وحجرين شيشة
يخلوا دماغى زى الريشة
وبنت معايا أو بنتين
أعيش وياهم أحلى يومين
مذاكرة مين يا عمنا سيبك
برشامة أهى وادعى لحبيبك
أنا مش هصلى ومش هصوم
حياتى هعيشها أكل ونوم
وقدامى عمرى لسه كتير
وليا رب اسمه كبير
وف الآخر أقدر أقول
أنا ميه ميه وشاب كول